३० मे मा मोदीले शपथ लिने

एजेन्सी । भारतका राष्ट्रपति रामनाथ कोविन्दले आइतबार ट्वीट गर्दै प्रधानमन्त्री र मन्त्रीहरूले ३० मेको साँझ सात बजे शपथ लिने उल्लेख गरेका छन् । प्रधानमन्त्री नरेन्द्र मोदी एनडीएको संसदीय दलको नेतामा चयन भएपछि उनी राष्ट्रपति रामनाथ कोविन्दलाई भेट्न ३ सय ५३ सांसदको समर्थन पत्र लिएर पुगेका थिए ।

नरेन्द्र मोदी लगातार दोस्रोपटक प्रधानमन्त्री पदका लागि शपथ लिँदै छन् । सन् २०१४ मा मा पनि मोदी मन्त्रिमण्डलले राष्ट्रपति भवनमा नै शपथ लिएको थियो । मोदीको मन्त्रिमण्डलमा को को नयाँ सदस्य आउनेछन् भन्ने विषय सार्वजनिक भएको छैन । पहिलोपटक संसद् प्रवेश गर्नका लागि बीजेपीका अध्यक्ष अमित शाह पनि मन्त्रिमण्डलमा जान सक्ने भारतीय समाचार एजेन्सीले अनुमान लगाएका छन् ।

शनिबार संसद्को सेन्ट्रल हलमा एनडीएको बैठक भएको थियो । जसमा प्रधानमन्त्री मोदीलाई एनडीए संसदीय दलका नेतामा चुनिएको थियो । एनडीए संसदीय दलको नेता चुनिएपछि मोदी मञ्चमा पुगेर संविधानअघि नतमस्तक भएका थिए । त्यसपछि उनले एनडीएका सबै दललाई धन्यवाद दिए । उनले सबैलाई लिएर अगाडि बढ्ने बताए । उनले सबैका साथ सबैको विकाससँगै अब सबैको विश्वासको नारा अगाडि सारेका छन् ।

इमरान र मोदीबीच फोनवार्ता

पाकिस्तानका प्रधानमन्त्री इमरान खानले लोकसभा चुनावमा भारी बहुमतले जित हासिल गरेर पुनः सत्तामा आएको भारतका प्रधानमन्त्री नरेन्द्र मोदीलाई फोन गरेर बधाई दिएका छन् ।

प्रधानमन्त्री मोदीले इमरानसँग यो क्षेत्रको शान्ति र समृद्धिका लागि हिंसामुक्त र आतंकमुक्त माहोल आवश्यक रहेको बताए । फ्रेबुअरीमा पुलवामा भएको आत्मघाती आक्रमण पछि पहिलोपटक दुई देशका प्रधानमन्त्रीबीच फोन वार्ता भएको हो । पाकिस्तानका विदेश मन्त्रालयका प्रवक्ता मोहम्मद फैसलका अनुसार इमरानले मोदीसँग फोनबाट बधाई दिएका हुन् ।