दुई कोरियाबीच अर्को महिना उच्चस्तरीय सम्मेलन

सोल – उत्तर र दक्षिण कोरियाका नेताहरूबीच आगामी महिना उच्चस्तरको सम्मेलन हुने भएको छ । उत्तर कोरिया भ्रमणमा रहेका दक्षिण कोरियाली राष्ट्र«पतिका विशेष दूत र उत्तर कोरियाली नेता किम जोङ उनबीचको भेटवार्तापछि दुई कोरियाले अप्रिलमा सम्मेलन गर्न सहमति जनाएका हुन् । दक्षिण कोरियाका राष्ट्रपति मुन जाय इनका विशेष दूतका रूपमा सोमबार उत्तर कोरिया पुगेका राष्ट्रिय सुरक्षा सल्लाहकार युई योङले उत्तर कोरियाली नेता किम जोङ उनसँग सोमबार साँझ भेटवार्ता गरेका थिए । सो भेटवार्तालाई दुवै कोरियाले महत्वपूर्ण बताएका छन् ।

पछिल्लो समयमा दुई कोरियाबीच बढेको सम्बन्धलाई उच्चस्तरीय बैठकसम्म पुर्याउने प्रयासस्वरूप दक्षिण कोरियाली राष्ट्रपतिले सोमबार आफ्ना विशेष दूत उत्तर कोरिया पठाएका थिए । उत्तर र दक्षिण कोरियाबीच आगामी केही दिनमा वार्ताको वातावरण तयार पार्न विशेष दूत त्यहाँ पुगेका दक्षिण कोरियाले बताएको छ ।

राष्ट्रपतिका विशेष दूत सोमबार उत्तर कोरियाली नेता किम जोङ उनद्वारा आयोजित रात्रिभोजमा पनि सहभागी भएको दक्षिण कोरियाका राष्ट्र«पतिका प्रवक्ता किम इयु क्योमले मंगलबार बिहान गरेको पत्रकार सम्मेलनमा जानकारी दिए । उत्तर कोरिया पुगेका विशेष दूत नेतृत्वको भ्रमण दलले सोमबार उत्तर कोरियाली नेतासँग भेटवार्ता गरेको थियो । भ्रमण दलमा दक्षिण कोरियाको गुप्तचर निकायका प्रमुखसहित दशजना सदस्य रहेका छन् ।

प्रतिनिधिमण्डलले उत्तर कोरियाली नेता किमलाई भेट गरी पछिल्लो समयमा विकसित सम्बन्ध सुधारलाई निरन्तरता दिने विषयमा सहमति जनाएको दक्षिण कोरिया सरकारले जनाएको छ । करिब एक दशकपछि पहिलोपटक उत्तर कोरिया पुगेका उच्च तहका अधिकारी र किम जोङ उनबीच भएको सो वार्तामा दुई कोरियाबीच आगामी दिनमा गर्न लागेको भनिएको उच्चस्तरीय बैठकका बारेमा छलफल भएको थियो ।

उत्तर कोरियाली नेतासँग प्रतिनिधिमण्डलले आगामी उच्च बैठकका बारेमा छलफल भएको उत्तर कोरियाली समाचार समिति, केसिएनएले जनाएको छ । सो भ्रमण र भेटवार्ताहरू सकारात्मक रूपमा अघि बढेको सो समाचार संस्थाले जनाएको छ प्रतिनिधिमण्डललाई उत्तर कोरियाका नेताले स्वागत गरेका थिए ।

आगामी दिनमा यी दुई देशका उच्चस्तरीय अधिकारीबीचको बैठकका लागि सो वार्ता महत्वपूर्ण भएको दक्षिण कोरियाली राष्ट्रपतिको कार्यालय ब्लुहाउसले जनाएको छ ।