कोरियाको उपभोक्ता मूल्य बढ्यो

सोल-दक्षिण कोरियाको उपभोक्ता मूल्य बढेको एक सरकारी प्रतिवेदनले देखाएको छ | यो बर्षको जुन महिनामा यहाको उपभोक्ता मूल्यमा आधारित मुद्रास्फीति (सीपीआई) गत वर्षको तुलनामा १ दशमलव ९ प्रतिशतले बढेको हो ।

गत महीना ताजा तरकारीको भाउमा १० दशमलव ६ प्रतिशतको वृद्धि भएको थियो भने ताजा फलफूलको भाउ पनि गत वर्षको तुलनामा २१ दशमलव ४ प्रतिशतले बढेको कोरियाको तथ्याङ्क कार्यालयले बताएको हो । ताजा फलफूलको भाउमा भएको वृद्घि झण्डै ६ वर्षकै उच्च हो ।

सरकारी तथ्यांक अनुसार तेलजन्य उत्पादनको भाउ २ दशमलव ८ प्रतिशतले बढेको थियो भने कृषिजन्य उत्पादनको भाउले ७ दशमलव ६ प्रतिशतको वृद्धि हासिल गरेको थियो ।

यसले प्रमुख मुद्रास्फीति बढ्न शून्य दशमलव ५९ प्रतिशतको योगदान दिएको बताइएको छ । त्यस्तै, ग्यास तथा डिजेलको भाउ पनि क्रमशः १ दशमलव ६ प्रतिशत र २ दशमलव २ प्रतिशतले बढेको थियो ।

कृषि तथा तेलजन्य उत्पादनको अस्थिर मूल्य समावेश नगरिएको कोर उपभोक्त मूल्य गत वर्षको तुलनामा १ दशमलव ४ प्रतिशतले बढेको थियो ।