कोरियाको औद्योगिक उत्पादनमा कमी

सोल – सन् २०१७ को मे महीनामा दक्षिण कोरियाको औद्योगिक उत्पादनमा कमी आएको सरकारी प्रतिवेदनले देखाएको छ ।

सो अवधिमा उत्पादन मात्र नभई निजी उपभोगसमेत घटेको त्यहाँको तथ्याङ्क कार्यालयले सार्वजनिक गरेको प्रतिवेदनले देखाएको हो । गत महीना कोरियाका सबै उद्योगको उत्पादन अघिल्लो महीनाको तुलनााम शून्य दशमलव ३ प्रतिशतले घटेको तथ्याङ्क छ । मेको उत्पादन कमी लगातार दोस्रो महीनाको हो ।

गत महीना औद्योगिक उत्पादनमा आएको कमीले निर्यातमा आएको सुधारलाई छायामा पारेको पनि बताइएको छ । पछिल्ला महीनामा निर्यातमा आएको सुधारका कारण म्यानुफ्याक्चरिङ क्षेत्र बढेको भए पनि सेवाक्षेत्रका कम्पनीमा भने उत्पादन सुस्ताएको छ ।

घरेलु माग कमजोर बनेका कारण पनि उत्पादन घटेको हुन सक्ने बताइएको छ । खानी तथा म्यानुफ्याक्चरिङ उद्योगको उत्पादन भने शून्य दशमलव २ प्रतिशतले बढेको पाइएको छ । विद्युतीय उपकरण तथा सेमिकण्डक्टरको माग बढेका कारण उत्पादन उकालो लागेको हुन सक्ने बताइएको छ ।

गत महीना विद्युतीय उपकरण र सेमिकण्डक्टरको उत्पादन क्रमशः ४ दशमलव ७ प्रतिशत र ९ दशमलव १ प्रतिशतले बढेको तथ्याङ्कले देखाएको छ । उता सेवाक्षेत्रको उत्पादनले भने शून्य दशमलव ३ प्रतिशतको कमी प्राप्त गरेको तथ्याङ्क छ । गत महीना निजी उपभोगको मापन गर्ने खुद्रा विक्री पनि अघिल्लो महीनाको तुलनामा शून्य दशमलव ९ प्रतिशतले घटेको छ । खुद्रा विक्रीमा आएको कमी गत जनवरीयताकै उच्च हो ।

सोही अवधिमा दूरसञ्चारका उपकरण र कम्प्युटरलगायत ड्युरेबल गुड्सको माग पनि १ दशमलव २ प्रतिशतले घटेको छ ।