दक्षिण कोरियाको मुद्रास्फीति १.९ प्रतिशत वृद्धि

सोल- दक्षिण कोरियाको उपभोक्ता मूल्य बढेको एक सरकारी प्रतिवेदनले देखाएको छ । गत महीना कच्चा तेलको भाउमा भएको वृद्धिका कारण उपभोक्ता मूल्यमा आधारित मुद्रास्फीति अघिल्लो महीनाको तुलनामा १ दशमलव ९ प्रतिशतले बढेको तथ्याङ्कले देखाएको हो ।

यन्ह्यप समाचार समितिले जनाए अनुसार अप्रिलमा तेलजन्य उत्पादनको भाउ ११ दशमलव ७ प्रतिशतले बढेको छ । यसले समग्र मुद्रास्फीति बढ्न शून्य दशमलव ४८ प्रतिशतको योगदान दिएको बताइन्छ । गत महीना ग्यास तथा डिजेलको भाउ क्रमशः साढे ९ प्रतिशत र १४ दशमलव १ प्रतिशतले बढेको पाइएको छ ।

त्यस्तै कृषिजन्य उत्पादनको भाउ साढे ४ प्रतिशतले बढेको थियो भने तरकारीको भाउमा ६ प्रतिशतको कमी आएको थियो । त्यस्तै सेवाक्षेत्रको भाउले पनि २ दशमलव २ प्रतिशतको वृद्धि हासिल गरेको थियो ।

कृषि तथा तेलजन्य उत्पादनको अस्थिर भाउ समावेश नभएको कोर उपभोक्ता मूल्य पनि १ दशमलव ३ प्रतिशतले बढेको तथ्याङ्क छ । गत महीना ताजा फलफूल तथा तरकारीको भाउ ४ दशमलव ७ प्रतिशतले बढेको भए पनि यो गतवर्षको अगष्टयताकै न्यून वृद्घि हो ।