उत्तर कोरियाली नेता किम जोंग–ऊनको बुइ चढ्ने यी व्यक्ति को हुन् ?

काठमाडौं – पछिल्लो हप्ता उत्तर कोरियाको एक रकेट इन्जिन परिक्षणपछि त्यहाँको सरकारी मिडियासँग जोडिएको प्रोपोगान्डा सार्वजनिक भइरहेको छ । अब उत्तर कोरियाका नेता किम जोंग–ऊनको उत्सवको तस्बिर सार्वजनिक भएको छ जसले अझै भ्रम फैलाइरहेको छ । यो विषयमा बीबीसीले अन्य जानकारी जम्मा गरेको छ ।

इन्जिन परिक्षण निकै सफल भएको जसका कारण रकेटको उद्योगमा उत्तर कोरियाका लागि यो ‘नयाँ जन्म’ जस्तै भएको भनी उत्तर कोरियाली नेता निकै दंगदास भएको दक्षिण कोरियाली समाचार एजेन्सीले दाबी गरिरहेको छ । निश्चित रुपमा किम जोंग–ऊन खुसी थिए । त्यहाँको सरकारी न्यूज एजेन्सी केसिएनएले तस्बिर पनि सार्वजनिक गरेको थियो ।

तस्बिरमा उनी टाढाबाट मिसाइल हेरिरहेका थिए । उनको अनुहारमा छुट्टै चमकसहितको मुस्कान छ । उनी नजिकै रहेका अधिकारीसँग हात मिलाइरहेको देख्न सकिन्छ । यसै तस्बिरमा एक अधवैंसे व्यक्ति उनको बुइ चढेको देख्न सकिन्छ । आखिर किमको बुइ चढ्ने यी व्यक्ति को हुन् र यसको कारण के हो त्यसबारे बीबीसीले छानबिन गरेको छ ।

पर्यवेक्षकका अनुसार ती रहस्यमयी व्यक्ति उत्तर कोरियाको राजनीतिमा कुनै परिचित अनुहार होइन । परमाणु परिक्षणमा ती व्यक्तिको महत्वपूर्ण भूमिका हुनसक्ने अनुमान गरिएको छ । सायद किमसँग उनको पहिले पनि कुराकानी हुने गरेको उनीहरुले अनुमान गरेका छन् ।

उत्तर कोरियाली पर्यवेक्षक मिशेल म्याडेनका अनुसार ती व्यक्तिको पोशाकमा जुन टाइटल छ, त्यसले उनी केपीए स्ट्र्याटिजिक फोर्समा मध्य र्याङ्कका अधिकारी भएको बताइएको छ । उनी मिसाइल फोर्सका इन्चार्ज हुन् ।

म्याडेन जोन हापकिंस युनिभर्सिटीमा अमेरिकी– कोरिया इन्स्टिच्युटसँग जोडिएको हुन् । उनी भन्छन्, ‘यद्यपी यो तस्बिर लगभग मंच–प्रायोजित लाग्छ । तर यो तस्बिर पूर्ण रुपमा बनावटी भने होइन । यो तस्बिर उत्साह बढाउने एक संकेतको रुपमा रहेको छ ।’

साथीत्व र उत्सवः

यो तस्बिरको मुख्य उद्देश्य देशमा किमको छवीलाई चम्काउनु हो । उनलाई मानिसहरुबिच निकै हँसिलो व्यक्तिको रुपमा देखाउने कोसिस गरिएको छ ।

सोलमा कोरिया युनिभर्सिटीका प्रोफेसर जाई–च्योंका अनुसार किम आफूलाई अन्तर्राष्ट्रिय स्तरमा हठी र सम्झौता स्विकार नगर्ने नेताको रुपमा पेश गर्छन् तर देशभित्र दोस्रो कहानी छ ।

उनले भने, ‘हामीलाई थाहा छ, उनी कति कडा छन् । जसले उनको आज्ञालाई मान्दैनन् ती व्यक्तिहरुप्रति उनी निकै कठोर छन् । दोस्रोतर्फ उनको प्रचार प्रसारमा अरु नै तस्बिर सार्वजनिक गरिन्छ । ’

म्यानका अनुसार किम आफ्ना पूर्ववर्तीहरुभन्दा यो विषयमा फरक छन् । उनका पूर्ववर्ती आफूलाई प्रेमभन्दा बढि डर पैदा गर्ने कुरामा विश्वास गर्दथे ।

उनले भने, ‘किम जोंग– उनले आफ्ना पिताको तुलनामा आफूलाई पारस्परिक आधारमा खुल्ला राख्ने कोसिस गरेका छन् । उनी आफ्नो नेतृत्वमा मानिसहरुको विश्वास पनि हाँसिल गर्न लालायित हुन्छन् । यदि उनले सुरक्षित महसुस नगरेको भए यो तस्बिर सार्वजनिक हुन दिँदैनथे ।’