दक्षिण कोरियामा कारका १० मोडेल प्रतिबन्धित

सोल-दक्षिण कोरियाले विभिन्न १० ओटा मोडेलका कारमाथि प्रतिबन्ध गर्ने निर्णय गरेको छ । प्रतिबन्धित कारमा जापानी कारनिर्माता कम्पनी निशान, जर्मन निर्माता कम्पनी बीएम्डब्ल्यू र प्रोश्चेका केही मोडेलहरू रहेको बताइएको छ । उत्सर्जनसम्बन्धी गलत प्रमाणपत्रहरू तयार गरेको भन्दै ती कारमाथि प्रतिबन्ध गरिएको त्यहाँको वातावरण मन्त्रालयले जानकारी दिएको छ ।

यसअघि फक्सवागनलाई पनि त्यस्तै कागजात तयार गरेको भन्दै प्रतिबन्ध गरिएको थियो । सन् २०१६ को अगष्ट महीनामा सरकारले उत्सर्जन र ध्वनि परीक्षणसम्बन्धी गलत कागजात तयार गरेको भन्दै यी कारका १० ओटा मोडेल पनि अनुसन्धानपछि प्रतिबन्ध गर्न सक्ने चेतावनी दिएको थियो । निशानको क्वासाकी मोडेल गतवर्षको जुनदेखि नै प्रतिबन्धित छ भने अन्य नौ मोडेलका कारहरू पनि गतवर्षको डिसेम्बर महीनादेखि नै प्रतिबन्धित रहेको वातावरण मन्त्रालयले बताएको छ ।

यसअघि दक्षिण कोरियामा विक्री भइसकेका ४ हजार ५ सय २३ सवारीसाधनको क्षतिपूर्तिस्वरूप करीब ५९ लाख डलर ती कम्पनीका स्थानीय विक्रेतालाई एकमुष्ठ जरीवाना गरिएको पनि मन्त्रालयले बताएको छ । निशान र बीएम्डब्ल्यूका कोरियाली एकाइका प्रवक्ताहरूले प्रतिबन्धित मोडेलका कारहरूको पुनः प्रमाणीकरण गर्न प्रयास गर्ने बताएका छन् । पछिल्लो तथ्याङ्कअनुसार दक्षिण कोरियामा सन् २०१६ को पहिलो ११ महीनासम्ममा विदेशी कारको विक्री ७ प्रतिशतले घटेको छ । यो सन् २००९ पछिकै सबैभन्दा कम भएको बताइएको छ ।