मौसम अनुकूल भएपछि सगरमाथामा एकैदिन एक सय ५० आरोही पुगे

काठमाडौँ – आइतबार मौसम अनुकूल भएपछि एक सय ५० आरोहीले सगरमाथाको सफल आरोहण गरेका छन् । मौसममा खराबी आएपछि क्याम्प टुमा रोकिएका आरोहीले एकैदिन सगरमाथा आरोहण गरेको आधार शिविरबाट सम्पर्क अधिकृत ज्ञानेन्द्र श्रेष्ठले बताए ।

हङकङका ४६ वर्षीया हिसाङ यिन हुङले पनि आइतबार सगरमाथाको सफल आरोहण गरेकी छिन् । स्पिड आरोहणको उद्देश्य सहित शनिबार दिउँसो १ः३० बजे आधार शिविरबाट उकालो लागेको हिसाङको टोली आइतबार दिउँसो ३:१२ बजे सगरमाथाको चुचुरोमा पुगेको सम्पर्क अधिकृत सोनाम शेर्पाले बताइन् । ड्रमर्स डेस्टिनेसन ट्रेक एन्ड एक्स्पिडिसन मार्फत उनीहरूले २४ घन्टा ५० मिनेटमा सगरमाथा सफल आरोहण गरेका हुन् ।

मौसम अनुकूल भएसँगै एक विदेशी नागरिकसहित दुईजना नेपाली आरोहीले पनि सगरमाथाको सफल आरोहण गरेका छन् । एक जापानिज नागरिक, सोलुखुम्बु सोताङका दावा शेर्पा र भोजपुरका छिरिङ शेर्पाले आइतबार बिहान करिब ९ बजे सफल आरोहण गरेको सम्पर्क अधिकृत शेर्पाले जानकारी दिए । उनीहरू सोमबार सगरमाथाको क्याम्प ४ मा फर्किएर आठ हजार पाँच सय १६ मिटरको लोत्से हिमाल आरोहण गर्ने तयारीमा छन् ।