गोसाइँकुण्ड मेला भर्दा लाङटाङ निकुञ्ज प्रवेश निशुल्क

रसुवा- जनैपूर्णिमाका अवसरमा लाग्ने गोसाइँकुण्ड मेला भर्न आउने नेपाली तीर्थयात्रीले लाङटाङ राष्ट्रिय निकुञ्ज प्रवेशमा शुल्क तिर्न नपर्ने भएको छ।

मेला अवधिभरका लागि शुल्क नलिइने निकुञ्जकी प्रमुख संरक्षण अधिकृत सुष्मा रानाले बताइन्। तर मिति भने यकिन भइनसकेको बताइएको छ। ‘कहिलेदेखि कहिलेसम्म शुल्क नलिने भनेर छिट्टै निर्णय गरेर कार्यान्वयन गरिनेछ,’ रानाले भनिन्। 

गएको वर्षदेखि निकुञ्जले नेपालीलाई प्रवेश शुल्क लिँदै आएको छ । निकुञ्जभित्र अध्ययन, अवलोकन र अनुसन्धानका लागि आउने नेपालीले एक सय रुपयाँ र भरियाले २५ रुपयाँ शुल्क तिर्नुपर्ने हुन्छ । शुल्क लिन थालिएपछि नेपाली पर्यटकको तथ्याङ्क राख्ने कार्य सुरु गरिएको छ ।

२०७५ असोज २९ गतेदेखि निकुञ्जले तथ्याङ्क राख्न सुरु गरिएको हो । असोज २९ गतेदेखि असार मसान्तसम्ममा ५ हजार ५ सय ५९ नेपाली भित्रिएका निकुञ्जका सूचना अधिकारी शिवलाल गैरेले बताए ।