जरिङ्गोको साग खाँदा एकै परिवारको चार गम्भीर बिरामी

बागलुङ – बागलुङको काठेखोला गाउँपालिका–५, बिहुँ रिजाल चोकमा जरिङ्गोको साग खाँदा एकै परिवारका चार जना गम्भीर बिरामी परेका छन् । बिहीबार बिहान साग खाँदा रिजालचोकका ७१ वर्षीया देउरुपा कँडेल, उहाँकी बुहारी ३७ वर्षीया चिजा कँडेल, छोरा ३७ वर्षीय चुडामणी कँडेल र १७ वर्षीय नाति सन्तोष कँडेल बिरामी परेका हुन् ।
साग खाएपछि चारै जना बेहोस भएको बिरामीका दाजु गणेश कँडेलले जानकारी दिए । बिहानको खाना खाएपछि भाइले रिङ्गटा लाग्यो भनेको र त्यसलगतै बेहोस भएको उनले बताए ।
परिवारका सबै सदस्यलाई घुमाउने तथा बेहोस भएपछि उपचारको लागि धौलागिरी अस्पताल पुर्याइएको थियो । अस्पताल पुगेपछि उहाँहरूको प्राथमिक उपचारपछि थप उपचारको लागि पोखरा रिफर गरिएको छ ।
‘बिरामीको अवस्था असामान्य थियो’ अस्पतालका प्रमुख डाक्टर शैलेन्द्र विक पोख्रेलले भने, ‘बेहोसी, मानसिक रुपमा अस्थिरता र मुटुको चाल पनि छिटो–छिटो भएको हुँदा पोखरा पठाएको हो ।’
बिरामीको पोखरास्थित गण्डकी मेडिकल कलेजमा उपचार सुरु भएको बिरामीका दाजु गणेश कँडेलले जानकारी दिए । उनका अनुसार सबै चेत अवस्थामा आएका छन् । छिमेकीले वनबाट ल्याएर साग दिएका थिए ।