लकडाउन लम्बिए गर्भवती महिलाको संख्या बढ्ने

काठमाडौँ-संयुक्त राष्ट्रसंघको जनसंख्या कोषले कोरोना भाइरस संक्रमणको कारण लकडाउन लम्बिँदै गए महिलाहरु गर्भवती हुने दर ह्वात्तै बढ्ने जनाएको छ।

लकडाउनले उत्पन्न गरेको परिस्थितिका कारण ठूलो सङ्ख्यामा महिलाहरुले अनिच्छित गर्भधारण गर्न सक्ने जोखिम बढेको कोषको भनाई छ।

गत अप्रिल २ मा विश्व आर्थिक मंचका लागि पीटर विचले तयार गरेको प्रतिवेदन अनुसार हाल विश्वका अधिकांश देशमा लागू भएको लकडाउन ६ महिनासम्म निरन्तर भए खासगरि निम्न तथा मध्यम आय भएका देशमा ४ करोड ७० लाख महिलाले परिवार नियोजनका साधनमा पहुँच गुमाउनेछन्।

त्यसको परिणामस्वरूप ७० लाख महिलाले अनिच्छित गर्भधारण गर्नसक्ने उसको अनुमान छ। कोषले लकडाउनको अवधिमा लैङ्गिक हिँसाका ३ करोड १० लाख अतिरिक्त घटना हुने पनि अनुमान गरेको छ।

केही देशहरूमा लकडाउन लागु भएपछि महिलाहरूले घरेलु हिँसाबाट पीडित भएर फोन गरेका घटनाहरू बढेको विवरणहरू आइसकेका छन्।