डब्लुएचओले भन्यो – अबको इपिसेन्टर अफ्रिका बन्न सक्छ

एजेन्सी –  विश्व स्वास्थ्य संगठन (डब्लुएचओ) ले कोरोना भाइरसको विश्वव्यापी महामारीको अबको इपिसेन्टर अफ्रिका बन्न सक्ने चेतावनी दिएको छ ।

महामारीबाट अफ्रिकामा कम्तिमा तीन लाख मानिसको ज्यान जाने सक्ने चेतावनी दिईएको छ ।

महामारीले त्यस क्षेत्रका तीन करोड मानिसलाई गरिबीको रेखामुनि धकेल्ने सम्भावना रहेको पनि संयुक्त राष्ट्रसंघले उल्लेख गरेको छ ।

अघिल्लो हप्ता अफ्रिकी देशहरुमा कोरोना भाइरसबाट संक्रमित हुनेको संख्या तीव्र रुपमा बढेको देखिएको छ ।

तीन लाख मानिसको मृत्यु हुने सक्ने चेतावनी दिँदै संयुक्त राष्ट्रसंघको अफ्रिकी आर्थिक कमिसनले सम्भावित महामारी नियन्त्रणमा लिनका लागि एक खर्ब अमेरिकी डलर बराबरको बजेट चाहिने बताएको छ ।

अफ्रिकामा एक अर्ब ३० करोड मानिसको बसोबास रहेको छ । अहिलेसम्म उत्तरी अफ्रिका सबैभन्दा बढी प्रभावित भएको छ । अल्जेरिया, इजिप्ट र मोरक्कोमा दुई हजार भन्दा बढी संक्रमित रहेका छन् ।