नरिवल पानीको गुणैगुण

नरिवल तपाई हाम्रा लागि नौलो फल हैन । खानाका स्वादिस्ट परिकार होस् या सौन्दर्यका साधन नै किन नहोस् । शिवालयहरुमा भगवान शीवलाई जल चढाउनदेखि घरमा प्रयोग हुने म्याट्रेस बनाउन नै किन नहोस् नरिवलको प्रयोग व्यापक छ । बाहीरी सरसफाई गर्न झाडु बनाउन देखी शरिर भित्र सरसफाई गर्ने औसधि बनाउन समेत नरिवलकै प्रयोग गरिन्छ ।

हामीले नरिवलको प्रयोग बृहत रुपमा गरेता पनि त्यसको पानीलाई खासै वास्ता गरिरहेका छैनौँ । तर नरिवलको पानीका तल दिएका गुणहरुको बारेमा जानकारी पाए पश्चात तपाइले नरिवलको पानी कहिल्यै खेर फाल्नुहुने छैन ।

छालाको हेरचाहमा आफूले खाने खानेकुराको असरको बारेमा त्यति गहन रुपमा लिइएको हुदैँन । फलफूल र त्यसको जुसले छालालाई निकै राम्रो गर्ने कुरालाई हामी सबैले बुुझ्नुपर्ने हुन्छ । सुन्तलाको जुसलाई छालाको लागि सर्वोत्तम मानिए पनि नरिवलको पानीले छालालाई पुर्याउने असरको बारेमा धेरैलाई थाहा नहोला ।

नरिवलको पानी, जसलाई पानीपछिको शुद्ध मानिएको छ, ले छालालाई हाइड्रेट, नरम र जवान देखाउने काम गर्दछ ।

नरिवलको पानीमा भएको एन्टिअक्सिडेन्ट र साइटोकिनिन्सले छालालाई चाउरी पर्नबाट जोगाउँछ । यसमा पाइने पौष्टिकताको पनि निकै कदर गरिएको छ । यदि तपाईं कमजोर महसुस गर्दै हुनुहुन्छ र पेटमा समस्या छ भने नरिवलको पानी पिउनुहोस्, यसले शक्ति प्रदान गर्दछ ।

नरिवलको पानी चिल्लो र गुलियो पदार्थ दुुबै नहुने भएका कारण यसलाई दिनको एक ग्लास पिउन सक्नुहुन्छ । तर अहिलेसम्म नरिवलको पानीले छालालाई पार्ने सकारात्मक असरको बारेमा केहि खोजी भएको छैन । यद्यपी, दैनिक रुपमा नरिवलको पानी पिउने गर्नुहोस् र हेर्नुहोस् कसरी तपाईंको छाला नरम र चम्किलो हुन्छ ।