आजदेखि सबै अन्तर्राष्ट्रिय उडान बन्द

काठमाडौं – सरकारले आजदेखि १० दिनका लागि सबै अन्तर्राष्ट्रिय उडान बन्द गरेको छ । कोरोना भाइरसको जोखिम उच्च भएपछि सरकारले यस्तो निर्णय गरेको हो ।

प्रधानमन्त्री केपी शर्मा ओलीले शुक्रबार देशबासीलाई सम्बोधन गर्दै ९ चैतदेखि नेपाल भित्रिने सबै अन्तर्राष्ट्रिय हवाई उडानहरु स्थगित गर्ने घोषणा गरेका थिए ।

घोषणा कार्यान्वयन गर्न गठित मुख्य सचिवको नेतृत्वको कार्यान्वयन समितिले आजदेखि घोषणालाई कार्यान्वयन गरेको हो ।

सबै अन्तर्राष्ट्रिय उडानमा गरिएको प्रतिबन्ध तत्काललाई चैत १८ सम्म लागू हुनेछ । नेपालबाट दैनिक ४५ देखि ५० वटासम्म अन्तर्राष्ट्रिय उडान हुँदै आएको थियो । उडान र अवतरण गर्दा गर्दा ९० हाराहारी हुँदै आएका थिए ।

यसैबीच नागरिक उड्ययन प्राधिकरणले शनिबार साँझ विज्ञप्ती निकाल्दै प्यासेन्जर फ्लाइटसहितका उडान मार्च २२ पछि पनि निरन्तर हुने जनाएपछि अन्यौलता सृजना भएको छ ।