कोरोना अपडेटः चीनमा मृत्यु हुने र नयाँ संक्रमित थपिएन, ईटलीको अवस्था भयावह

एजेन्सी कोरोना भाईरसको संक्रमणको केन्द्रबीन्दु चीनमा पछिल्लो २४ घण्टामा कोही संक्रमित पनि थपिएका छैनन् । यस्तै मृत्यु हुनेको संख्या पनि नथपिएका आधिकारीक तथ्यांकले देखाएको छ । चीनमा यो संक्रमणका कारण ३ हजार दुई सय ३७ जनाको मृत्यु भएको छ ।
अहिलेसम्म विश्वभर मृत्यु हुनेको संख्या ९ हजार पुगिसकेको छ ।

चीन कोरोना भाईरसको संक्रमणबाट मुक्त हुँदै गर्दा इटलीको अवस्था भने भयावह बन्दै गएको छ । ईटलीमा पछिल्लो २४ घण्टामा मात्रै ४ सय ७५ जनाको मृत्यु भएको छ । योसँगै ईटलीमा मृत्यु हुनेको संख्या २ हजार ९ सय ७८ जना पुगेको छ । यहि रफ्तारमा मृत्यु हुनेको संख्या बढ्दै जानो हो भने अबको १ देखि २ दिनमा चीनको भन्दा बढि हुने देखिन्छ ।

विश्वभरको तथ्यांक हेर्दा अहिलेसम्म २ लाख १८ हजार ९ सय ९७ जनामा संक्रमण देखिएको छ । ८४ हजार ७ सय ९५ जना निको भएर घर फर्किएका छन् । ईटलीपछि यो संक्रमणबाट ईरानमा ११ सय ३५ जनाको मृत्यु भैसकेको छ ।

पछिल्लो समय युरोप र पश्चिमी प्रशान्त क्षेत्रमा यसको प्रकोप बढ्दै गएको छ ।

डब्लुएचओका प्रमुख टेड्रोस गेब्रोयसियसले महामारी नियन्त्रणका लागि सबैले रोग परीक्षणको संयन्त्रलाई प्रभावकारी बनाउनुपर्नेमा जोड दिएका छन् ।

युरोपका विभिन्न देशहरुमा संक्रमितहरुको संख्या बढ्दै गएको छ । जसका कारण ६५ वर्ष भन्दा बढी उमेर समूहका व्यक्तिको मृत्यु भएको बताइएको छ ।

यसैबीच संक्रमण फैलिएपछि युरोपका देशहरुले सीमा बन्द गरेका छन् भने अत्यावश्यकबाहेक घर बाहिन नजान आफ्ना नागरिकलाई आग्रह गरेका छन् । एजेन्सी