कोरोना त्रास -हुवानमा प्रदर्शनी केन्द्रलाई अस्थायी अस्पताल बनाइने

काठमाण्डौ-चीनको हुवेवी प्रान्तस्थित हुवान सरकारले त्यहाँ रहेका तीन विशेष सार्वजनिक स्थललाई अस्थायी अस्पताल बनाउने भएको छ ।

सरुवा रोग नियन्त्रण विभागले दिएको जानकारी अनुसार जिम्नेसियम लगायतका तीन प्रदर्शनी केन्द्रहरुलाई कोरोना संक्रमित विरामीहरुको ब्यवस्थापन तथा उपचारका निम्ति प्रयोगमा ल्याइने भएको हो ।

होङसान जिम्नेसियम, हुवान अन्तराष्ट्रिय सम्मेलन तथा प्रदर्शनी केन्द्र तथा हुवान सांस्कृतिक संस्थानका भवनहरुलाई अस्पतालका रुपमा प्रयोग गरिने भएको हो । यस क्षेत्रका कोरोना भाइरस संक्रमित तथा संक्रमणको शंका लागेका विरामीहरुलाई यी अस्थायी अस्पतालहरुमा राखेर उपचार गरिने छ ।

यी अस्पतालहरुले आपतकालीन ओषधि केन्द्र, इमरजेन्सी उपचार सेवा तथा मेडिकल जाँचको काम गर्ने छन् । सोमबार बेलुका बाट सुरु गरिएको उक्त काम मंगलबार सम्ममा सैयौ शैया सहित उपचारार्थ तयार हुने एक सरकारी अधिकारीले जानकारी दिएका छन् ।

यस अधि नै १ हजार शैयाको अस्पताल सञ्चालनमा आइसकेको छ भने १६ सय शैयाको अस्पताल निर्माण अन्तिम चरणमा पुगेको छ । चीनमा कोरोना भाइरसले ३ सय भन्दा बढीको ज्यान लिए पछि सरकार उक्त रोग संग लड्न आक्रामक भएर लागि परेको छ ।