चीनबाट ल्याईने नेपालीलाई १५ दिन क्वारेन्टाईनमा राखिने

काठमाडौं – चीनबाट ल्याउन लागिएका नेपाली विद्यार्थीहरुलाई १५ दिनसम्म छुट्टै स्थान क्वारेन्टाइनमा राखिने भएको छ ।

काठमाडौंमा पत्रकार सम्मेलन गरी स्वास्थ्य तथा जनसंख्या मन्त्रालयले कोरोला भाईरस प्रभावित क्षेत्रबाट नेपाल ल्याउन लागिएका उनीहरुलाई १५ दिनसम्म क्वारेन्टाईनमा राख्ने तयारी भएको जानकारी गराएको हो ।

चीनबाट स्वास्थ्य परीक्षण गरेर स्वस्थ विद्यार्थीलाई मात्र नेपाल ल्याईने भन्दै मन्त्रालयले त्रिभुवन अन्र्तराष्ट्रिय विमानस्थलमा उनीहरुको पूनःपरीक्षण समेत गरिने जनाएको छ ।

परीक्षणपछि संक्रमित भेटिएकालाई आइसोलेसन वार्डमा राखेर उपचार गरिनेछ ।
बाँकीलाई क्वारेन्टाइनमा राखिने छ ।

यसका लागि सम्भावित स्थलहरुको खोजी भैरहेको मन्त्रालयका प्रवक्ता महेन्द्र श्रेष्ठले बताए । परराष्ट्र मन्त्रालयले चीनमा रहेका विद्यार्थीहरुलाई नेपाल ल्याउन तयारी शुरु गरिसकेको जनाएको छ ।

कोरोना भाइरसका संक्रमण फैलिएसँगै चीनबाट नेपाल आउन चाहेका विद्यार्थीहरुलाई सुरक्षा सतर्कता अपनाएर ल्याउन तयारी गरिएको हो ।

नेपाल आउन चाहने विद्यार्थीको नामावली र विवरण संकलन भइरहेको र अहिलेसम्म १ सय ७७ विद्यार्थी बेइजिङस्थित दूतावासको सम्पर्कमा आएको मन्त्रालयका प्रवक्ता भरतराज पौड्यालले बताए ।