चीनमा कोरोना आतंक – पीडितका लागि ४ हजार कामदारले २० दिनमै बनाउदै अस्पताल

काठमाडौँ-चीनको हुवान प्रान्तमा निर्माणाधिन बेइजिङको ‘सार्स ट्रिटमेन्ट मोडेल’ का अस्पतालहरु छिट्टै सञ्चालनमा आउने त्यहाँको समाचार संस्था सिन्ह्वाले प्रान्तिय सरकारी श्रोतलाई उदृत गर्दै बताएको छ ।

सरकारी अधिकारीका अनुसार हुवानमा निर्माणाधिन दुई अस्पतालहरुले फेब्रुअरी ३ र ६ तारिखबाट बिरामीहरुलाई सेवा दिन सुरु गर्ने गरि काम भइरहेको छ ।

४ हजार मजदुर, १ हजार ट्रकहरु, स्काभेटरहरु दिनरात नभनी २० दिन मै तोकिएको मितिमा अस्पताल निर्माण गर्न लागि परेको एक सरकारी अधिकारीले उल्लेख गरेका छन् ।

‘द हाउसेनसेन’ (अग्निदेव हिमाल) नाम दिइएको उक्त अस्पताल ३४ हजार वर्ग मिटर क्षेत्रफलमा फैलिएको छ र यो अस्पतालहरुमा १ हजार शैया रहने छन् र उक्त अस्पतालमा फेब्रुअरी ३ तारिखबाट उपचार सुरु गरिने जानकारी स्थानिय नगर का मेयर जउ छियानवाङले दिएका छन् ।

१ हजार ५ सय शैया क्षमताको अर्को अस्पताललाई लेइसेनसेन नाम दिइएको छ जुन ७५ हजार बर्ग मिटर क्षेत्रफलमा फैलिएको छ । यो अस्पतालले भने फेब्रुअरी ६ तारिखबाट आफ्नो सेवा सुरु गर्ने छ ।

स्मरण रहोस्, हालै मात्र कोरोना भाइरसबाट हुवानमा मात्र १२२० मानिस संक्रमित भएका छन् । ४२ जनाको मृत्यु गत विहिवार मात्र भएको थियो ।