मर्निङ वाक गर्दा पालन गर्नुपर्ने ७ नियम

मर्निङ वाक बिहानमा गरिने हिँडडुल हो । यो स्वस्थ जीवनका लागि एक आवश्यक व्यायाम पनि हो । शारीरिक तन्दुरुस्तीका साथै दीर्घ र स्वस्थ जीवनका लागि मर्निङ वाक गरिन्छ । यो सबै उमेरका समूहका मानिसका लागि उत्तिकै लाभदायी र जरुरी पनि छ । शरीर आफंैमा विभिन्न रोगहरूको घर हो । मानिस उच्च वा न्यून रक्तचाप, मधुमेह, मुटुरोग आदिबाट निकै ग्रसित छन् । यिनीहरूका लागि पहिलो स्वास्थ्य टिप्स भनेको मर्निङ वाक नै हो । डाक्टरहरूले पनि नियमित मर्निङ वाक गर्न सल्लाह दिने गर्दछन् । मर्निक वाक त मोटा मानिसहरूका लागि रामवाण नै हो ।

मर्निङ वाक गर्दा निम्न ७ कुरामा ध्यान दिनुपर्छ

१- बिहान सबेरै करिब चारदेखि आठ बजेसम्म मर्निङ वाक गरिसक्नुपर्छ । मर्निङ वाक गर्दा कम्तीमा पनि आधाघन्टा त हिँड्नै पर्छ । हिँडेर थाकियो भने स्थिर भएर बस्न हुँदैन । बिस्तारै बिस्तारै बिसाएझैं गरी निरन्तरता दिनुपर्छ ।

२-मर्निङ वाक गर्दा सुरुमा बिस्तारै हिँडेर चाललाई अघि बढाउनुपर्छ र हातको ताललाई पनि मिलाउनुपर्छ । हिँड्दा ठाडो भएर छात्ती फुलाएर, ढाड सीधा पारेर कसैसँग कुरा नगरी अनुशासनपूर्वक हिँड्नुपर्छ । लेफ्ट राइटको तालमा हातखुट्टाको ताल मिलाए धेरै राम्रो । तर, कहिले दगुर्ने र कहिले बिस्तारै हिँड्ने गर्नुहुँदैन ।

३- कपडाको छनौट हो । कपडा निकै सहज हुने खालको लुज र हल्का हुनुपर्छ । कुन मौसममा मर्निङ वाक निस्किएको हो, सो मौसमअनुसार कपडा छनौट गर्नुपर्छ । कपडा भने फुल साइजको पुरै शरीर ढाक्ने नै हुनुपर्छ । यसले कुकुर तथा अन्य जीवजन्तुको टोकाइबाट बचाउँछ । जुत्ता गिट्टी भएको स्लिप नखाने खालको लगाउनु पर्छ ।

४-आफ्नो ध्यानाकर्षण र एकाग्रताका लागि संगीतको धुन सुनेमा फाइदा हुन्छ । संगीतले मर्निङ वाकमा रचनात्मक र स्फूर्ति दिलाउने भूमिका खेल्छ । सुन्नका लागि हेडसेट वा इयरफोन राख्ने होइन । स्पिकर ठूलो पारेर सुन्दै हिँड्दा राम्रो हुन्छ ।

५-जिस्केर, गफिएर मर्निङ वाक गर्नुहुँदैन । गफिएर गरेको मर्निङ वाकमा उद्देश्य नै थाहा हुँदैन र उक्त उद्देश्य पनि पूरा हुँदैन । मर्निङ वाक एकान्तमा गर्नुहुँदैन र एक्लै पनि गर्नुहुँदैन । कथंकदाचित रक्तचाप बढेर घात भयो वा कुनै दुर्घटना भयो भने सहयोगीहरू पाइँदैनन् ।

६-तनावमा मर्निङ वाक गर्नुहुँदैन । नकारात्मक कुराले शरीरमा हानि गरिरहेको हुन्छ । त्यसैबेला विकृत वा असन्तुलित दिमाग लिएर हिँड्ने काम राम्रो होइन । विचलित मनले दुर्घटना नजिक लैजान सक्छ । मर्निङ वाकमा जाँदा ध्रुमपान र मद्यपान गरेर निस्कनुहुँदैन । हिँड्दा पनि ध्रुमपान गर्नुहुँदैन ।

७- कुकुरजस्ता टोक्ने प्राणीहरूलाई जिस्क्याउनुहुँदैन । र, साथमा लिएर पनि जानुहुँदैन । स्वास्थ्यका लागि हो मर्निङ वाक, योे कुरा ख्याल गर्नुपर्छ । मर्निङ वाकबाट आएपछि सागपात, पोषिलो तथा झेलिलो खानेकुरा खानुपर्छ । त्यसपछि आरामसँग नुहाउनुपर्छ ।