प्रधानमन्त्री पूर्ण होसमा रहेको स्वास्थ्य मन्त्री ढकालद्वारा जानकारी

काठमाडाैं-सोमबार रातीबाटै स्वास्थ्यमा समस्या आएपछि मंगलबार बिहानै अस्पताल भर्ना भएका प्रधानमन्त्री केपी शर्मा ओली अहिले आईसीयूमा छन् । प्रधानमन्त्री पूर्ण होसमा रहेको र स्वास्थ्य अवस्था स्थिर रहेको स्वास्थ्य मन्त्री भानुभक्त ढकालले जानकारी दिए ।

‘म अहिले प्रधानमन्त्रीलाई भेट्न अस्पताल आएको छु । वहाँ होसमा हुनुहुन्छ र स्वास्थ्य स्थिति पनि स्थिर छ । म अझै केही अस्पतालमै समय बसेर उपचारका विषयमा थप जानकारी लिनेछु,’ स्वास्थ्य मन्त्री ढकालले बताए ।

पेटमा समस्या देखिएपछि मंगलबार बिहानै अस्पताल भर्ना भएका ओलीको दिउँसो १२ः४५ बजे एपेन्डिसाइटिसको शल्यक्रिया गरिएको थियो । शल्यक्रियापछि प्रधानमन्त्रीको आईसीयुमा उपचार भइरहेको छ । उपचारमा संलग्न चिकित्सकले थप समस्या आउन सक्ने सम्भावना औल्याउँदै अझै ३ दिन अस्पतालमै राख्नु पर्ने बताएका छन् ।

अस्पतालले पनि साँझ ७ः३० बजे विज्ञप्ती निकाल्दै प्रधानमन्त्रीको स्वास्थ्य अवस्था स्थिर रहेको जानकारी दिएको छ । स्वास्थ्य अवस्था गम्भिर भएपनि स्थिर रहेको अस्पताल स्रोतले जानकारी दिएको छ ।

यसअघि अस्पतालले विज्ञप्तीमार्फत् नै ओलीमा एपेन्डिसाइटिस तथा पेरिटोनाइटिस भएको जानकारी दिएको थियो । डा. रमेशसिंह भण्डारीसहितको टोलीले ओलीको एपेन्डिसाइटिसको शल्यक्रिया गर्नुका साथै लेपेरोटोमी पनि गरेको थियो ।

सामान्य विरामीलाई पनि शल्यक्रियापछि गाह्रो हुने बताउँदै स्वास्थ्य मन्त्री ढकालले प्रधानमन्त्रीको भर्खरै मिर्गौलाको डायलाइसिस गरिएकोले विशेष सावधानी अपनाइएको जानकारी दिए । प्रधानमन्त्री ओलीको तीन दिनअघिमात्र ग्राण्डी अस्पतालमा तेस्रो डायलाइसिस गरिएको थियो ।