बायर्न म्युनिखसँग ८-२ को लज्जास्पद हार बेहोर्दै बार्सिलोना च्याम्यिन्स लिगबाट बाहिरियो

लिस्बन — जर्मन च्याम्पियन बायर्न म्युनिखले बार्सिलोनालाई लज्जास्पद हार चखाउँदै च्याम्पियन्स लिगको सेमिफाइनल प्रवेश गरेको छ । शुक्रबार राति लिस्बनमा भएको क्वाटरफाइनलमा बायर्नले बार्सिलोनालाई ८–२ को गोल अन्तरले हराएको हो ।

थोमस मुलरले खेलको चौथो मिनेटमा गरेको गोलबाट बायर्नले अग्रता लिएको थियो । खेलको ७औं मिनेटमा बायर्नका डेभिड अलाबाको आत्मघाती गोलबाट खेल बराबरीमा फर्किएको थियो । तर त्यसपछि भने स्पेनिस क्लब बार्सिलोनामाथि बायर्न लगातार हाबी देखियो । २१औं मिनेटमा इभान पेरिसिचले गोल गर्दै खेललाई २–१ को अवस्थामा पुऱ्याए । त्यस्तै २७औं मिनेटमा सर्गे जिएन्ब्रेले बार्यनका लागि तेस्रो गोल गरे ।

३१औं मिनेटमा मुलरले व्यक्तिगत दोस्रो गोल गरे भने खेललाई ४–१ मा पुऱ्याए । लुइस स्वारेजले ५७औं मिनेटमा गोल गर्दै खेललाई २–४ मा पुऱ्याए । तर त्यसको ६ मिनेटपछि ६३औं मिनेटमा जोसुजा किमिचले बायर्नका लागि ५ औं गोल गरे । खेलको ८२औं मिनेटमा रोबर्ट लेवान्डोस्कीले बायर्नका लागि छैटौं गोल गरे भने ८५औं र ८९औं मिनेटमा फिलिपे कौटिन्होले ७औं र ८औं गोल गरे ।
बार्सिलोना सन् १९४६ को कोपा डेल रेको फाइनलमा सेभियासँग ८ गोल खाएयता पहिलो पटक बायर्नसँगको खेलमा ८ गोल खाएको हो । त्यस्तै सन् १९५१ मा स्पेनिस लिगमा इस्पान्योलसँग ६–० को हार बेहोरेको बार्सिलोनाले त्यसयता ठूलो अन्तरको हार बेहोरेको छ ।

च्याम्पियन्स लिगको यो खेललाई सन् २०१४ को विश्वकप सेमिफाइनलसँग तुलना पनि सुरु भएको छ, जसमा मुलर सम्मिलित जर्मनीले ब्राजिललाई ७–१ ले हराएको थियो ।

जर्मनीले त्यो विश्वकप जितेको थियो र अब बायर्न पनि च्याम्पियन्स लिग उपाधिका लागि बलियो दाबेदार भएको छ । सेमिफाइनल पुगेको बायर्नले अब म्यानचेस्टर सिटी अथवा लियोनको सामना गर्नेछ ।