ए डिभिजन लिगमा आजदेखि आठौं चरणका खेल सकिने

काठमाण्डौ – शहीद स्मारक ए डिभिजन लिग फुटबलमा आज शनिबार आठौं चरणका खेलहरु सकिने भएको छ ।
आठौं चरणका अन्तिम दुई खेल दशरथ रंगशलामा हुने छन् ।

पहिलो खेलमा न्युरोड टिम एनआरटी र त्रिभुवन आर्मी क्लबबीच प्रतिस्पर्धा हुनेछ । आर्मी तालिकाको शीर्ष स्थानमा छ । तर अरु दुई टिमको पनि आर्मीसँगै समान १६ अंक भएकाले आजको खेलमा जीत निकाले स्पष्ट तीन अंकले अघि बढ्ने छ ।

एनआरटी भने ११ अंकको साथमा सातौं स्थानमा छ । शनिबारको खेलमा एनआरटी विजयी भए चौथो स्थानमा रहेको थ्रीस्टारसँग अंक बराबरी गर्ने छ ।

आर्मी र एनआरटी बराबरीमा रोकिए आर्मीले १ अंकको अग्रता लिने छ भने एनआरटीले पाँचौं स्थानमा जावलाखेलसँग अंक बराबरी गर्ने छ ।

आजको दोस्रो खेलमा फ्रेण्ड्स र संकटा आमने सामने हुने छन् । फ्रेण्ड्स जारी लिगमा ११ औं स्थानमा छ भने संकटा नवौं स्थानमा छ ।

शनिबारको खेलमा फ्रेण्ड्स विजयी भए आठौं स्थानमा पुग्ने छ भने संकटा विजयी भए छैटौं स्थानमा उक्लने छ । प्रतियोगिता अन्तर्गत शुक्रबार मनाङ र च्यासल विजयी भएका थिए ।