दक्षिण एसियाली खेलकुद प्रतियोगिताको भव्य उद्घाटन

काठमाडौं – १३ औं दक्षिण एसियाली खेलकुद प्रतियोगिता (साग) को औपचारिक उद्घाटन भएको छ ।

त्रिपुरेश्वरस्थित दशरथ रंगशालामा आइतबार साँझ दक्षिण एसियाली खेलकुदको महाकुम्भ मेलाको औपचारिक उद्घाटन भएको हो ।राष्ट्रपति विद्यादेवी भण्डारीले सागको उद्घाटन गरेकी हुन् ।

‘म साग खेलकुद सुरु भएको घोषणा गर्दछु,’ राष्ट्रपति भण्डारीले सम्बोधन गर्दै भनिन् ।उद्घाटनमा नेपालको मौलिकता झल्किने विभिन्न सांस्कृतिक झाँकीहरुको प्रदर्शन गरिएको छ ।राष्ट्रपतिको सम्बोधनअघि सातै राष्ट्रका खेलाडीले मार्चपास गरेका थिए ।

यस्तै कीर्तिमानी तेक्वान्दो खेलाडी दिपक विष्टले सागको दिप प्रज्वलन गरेका थिए  । त्यसपछि खेलाडी, रेफ्री र निर्णायकले शपथ खाएका थिए  ।