विश्वकप छनोट २०२२ : नेपालले चाइनिज ताइपेइलाई हरायो

काठमाडौं – सन् २०२२ मा कतारमा हुने फिफा विश्वकप र चिनमा हुने एसियन कप २०२२ को छनोट अन्तर्गत दोस्रो चरणको दोस्रो खेलमा नेपालले चाइनिज ताइपेइलाई २-० ले पराजित गरेको छ। जितसँगै नेपालले महत्त्वपूर्ण तीन अंक हासिल गरेको छ ।अन्जन विष्टको दुई गोलमा नेपालले चाइनिज ताइपेइलाई उसकै घरेलु मैदानमा २-० ले पराजित गरेको हो। विश्वकप छनोटको दोस्रो चरणमा नेपालको यो ऐतिहासिक पहिलो जित हो।

नेपालले पहिलो हाफको तेस्रो मिनेटमा नै अग्रता बनाएको थियो। सुजलले प्रहार गरेको फ्रिकिकमा अन्जनले झन्डै २५ यार्ड टाढाबाट सुन्दर गोल गरेका थिए। घरेलु मैदानमा पछाडी परेको ताइपेइले लगातार नेपाल माथि आक्रमण बनाएपनी नेपाली डिफेन्स र गोलकिपरले उकृष्ट प्रदर्शन गरे।

नेपालले दोस्रो हाफमा अग्रता दोब्बर बनाएको हो। ६३ औ मिनेटमा अन्जनले अनमार्क रहेको अवस्थामा पेनाल्टी क्षेत्रबाहिर उत्कृष्ट बल नियन्त्रणमा लिदैँ दोस्रो टचमा सानदार हाफ भलीमा गोल गरेका थिए।

यस नतिजासँगै नेपाल अंक तालिकाको अन्तिमबाट माथि उक्लिँदै तेस्रो स्थानमा उक्लेको छ। समान ३-३ अंक जोडेका कुवेत पहिलो र जोर्डन दोस्रो गोल स्थान मा छन्। अष्ट्रेलियाले कुनै खेल खेलेको छैन भने ताइपेइ लगातर दोस्रो हारपछि तालिकाे पुछारमा छ। आज नै समूहको अर्को खेलमा समुहको बलिया टोली अष्ट्रेलियाले कुवेतको घरेलु मैदानमा खेल्नेछ ।