रोनाल्डोलाई चिनियाँ क्लबको ३०० मिलियन युरोको अफर

काठमाडौं – क्रिस्टियानो रोनाल्डोका एजेन्ट जर्ज मेन्डेजले एक चिनियाँ क्लबले पोर्चुगिज खेलाडीलाई किन्न रियल म्याड्रिडलाई ३ सय मिलियन युरोको अफर गरेको खुलासा गरेका छन् । तर, स्टार खेलाडीले भने उक्त प्रस्ताव अस्वीकार गरेको मेन्डेजले बताएका हुन् ।

पछिल्लो समय चिनियाँ सुपरलिगका क्लबहरुले ट्रान्सफर मार्केटमा ठूलो रकम खर्च गरिरहेका छन् । पछिल्लो समय ब्राजिलियन ओस्कार र अर्जेन्टिनी कार्लोस टेभेजलाई किन्दा त्यहाँको क्लबले ठूलो रकम खर्च गरेको थियो ।
सांघाई एसआइपिजीले ओस्कार तथा सेन्हुवाले टेभेजलाई किन्न किर्तिमानी रकम खर्चेको थियो ।मेन्डेजका अनुसार चिनियाँ क्लबले रियललाई ठूलो रकमको अफरको साथै रोनाल्डोलाई प्रतिवर्ष १ सय मिलियन युरोभन्दा बढीको तलबको पनि अफर गरेको थियो ।

यदी यो अफर स्वीकार गरेको भए रोनाल्डो सजिलै फुटबल इतिहासमा सर्वाधिक महंगो खेलाडी बन्ने थिए । केही दिनअघि मात्र टेभेज विश्वको सबैभन्दा महंगो खेलाडी बनेका थिए ।रोनाल्डोले आफू पैसाबाट प्रेरित नभएको बताउँदै उक्त अफर अस्वीकार गरेको मेन्डेजले दाबी गरे ।

‘रियल म्याड्रिडलाई ३ सय मिलियन युरो र रोनाल्डोलाई प्रतिवर्ष १ सय मिलियन युरोको अफर चिनियाँ क्लबबाट आएको थियो,’ स्काई स्पोर्ट इटालियासँग कुरा गर्दै मेन्डेजले भने, ‘तर, पैसा सबै कुरा होइन, रोनाल्डोका लागि रियल आफ्नो जीवनको अंग बनेको छ ।’

२०१६ को बालोन डि’ओरका विजेताले गत नोभेम्बरमा मात्र सन् २०२१ सम्म रियलमा रहने गरी करार अवधि थप गरेका थिए । रियलमा रहँदा उनले दुई वटा च्याम्पियन्स लिग, लिग उपाधि र कप उपाधि जितेका छन् ।