एसिया कपमा नेपालको दोस्रो हार

काठमाडौँ – महिला एसिया कप टी–२० प्रतियोगितामा नेपालले लगातार दोस्रो हार बेहोरेको छ । पहिलो खेलमा पाकिस्तानसँग पराजित भएको नेपाल दोस्रो खेलमा श्रीलंकासँग ८ विकेटले पराजित भएको हो ।

नेपालले प्रस्तुत गरेको २४ रनको लक्ष्य श्रीलंकाले मात्र ४.३ ओभरमा २ विकेटको क्षतिमा पछ्याएको थियो । श्रीलंकाका लागि हसिनी परेराले १७ रनको योगदान दिँदै जीत दिलाइन् |

नेपालका लागि करुना भण्डारी र रुविना क्षेत्रीले १–१ विकेट लिए । यसअघि टस हारेर नेपाल पहिलो ब्याटिङ गर्दा १६.२ ओभरमा अलआउट हुँदै २३ रन बनाएको थियो ।

नेपालका लागि ओपनर ज्योति पाण्डेले १६ रनको योगदान दिनुबाहेक अन्य खेलाडीले रन बनाउन सकेनन् । नेपालका सात खेलाडी खाता नखोली पभिलियन फर्किए ।

श्रीलंकाका लागि सुगन्धिका कुमारी र इनो रनविराले ३–३ विकेट लिए ।अब नेपालले मङ्सिर १४ मा बंगालदेश, १६ मा थाइल्याण्ड र १७ मा भारतको सामना गर्नेछ ।

राउण्ड रोबिनको आधारमा खेलाइने यो प्रतियोगितामा शीर्ष दुई टोलीबीच उपाधिको लागि भिडन्त हुनेछ ।