सिद्धार्थ बैंकले ३०% हकप्रद सेयर निष्काशन गर्दै

काठमाडौं – सिद्धार्थ बैंकले ३०% हकप्रद सेयर निष्कासन गर्न धितोपत्र बोर्डसँग अनुमति मागेको छ । सिद्धार्थले १०० रुपैयाँ दरको एक करोड ५७ लाख ५२ हजार ५७८.१३ कित्ता हकप्रद सेयर निष्कासन गर्न खोजेको हो ।

बैंकको १०ः३० अनुपातमा आउने यो हकप्रदमा लक्ष्मी क्यापिटल मार्केट लिमिटेड बिक्री प्रबन्धक रहनेछ । राष्ट्र बैंकले चुक्ता पुँजी बढाउन दिएको समयसिमा नजिकिंदै पुनः हकप्रद जारी गर्ने तयारी गरेको हो । यसअघि पनि सिद्धार्थले गत कात्तिक ११ देखि मंसिर १५ गतेसम्म ७५ लाख ५५ हजार १९३ कित्ता हकप्रद सेयर बिक्री खुला गरेको थियो ।

सिद्धार्थले सेयरधनीलाई गत वर्षको नाफाबाट ३९% बोनस सेयर दिएको छ । बैंकले यसअघि बिक्री गरेको २५% हकप्रदलाई समेत जोडेर ३९% बोनस सेयर दिएको हो । अब बैंकले बोनस सेयर जोडेर कायम हुने चुक्ता पुँजीको ३०% हकप्रद ल्याउनेछ ।

हाल सिद्धार्थको चुक्ता पुँजी पाँच अर्ब २३ करोड ५० रुपैयाँ छ । चालु आर्थिक वर्षको दोस्रो त्रैमासमा सिद्धार्थले ७२ करोड ६० लाख ३७ हजार रुपैयाँ खुद नाफा कमाएको छ । प्रतिसेयर आम्दानी २७ रुपैयाँ ७४ पैसा रहेको बैंकको प्रतिसेयर नेटवर्थ १४७ रुपैयाँ २२ पैसा छ ।