लगानीको सुवर्ण अवसर , एक अर्बको लक्ष्मी इक्विटी फन्ड आउदै

काठमाडौं – नेपालको सेयरबजारमा एक अर्ब रुपैयाँ बराबरको अर्को सामुहिक लगानी कोष थपिने भएको छ । लक्ष्मी बैंकको सहायक कम्पनी लक्ष्मी क्यापिटललाई एक अर्ब रुपैयाँ बराबरको लक्ष्मी इक्विटी फन्ड जारी गर्न धितोपत्र बोर्डले अनुमति प्रदान गरेको छ ।

यसअघि ४० करोडको सामुहिक लगानी कोष लक्ष्मी भ्यालु फण्ड जारी गरेको लक्ष्मी क्यापिटलको यो दोस्रो सामुहिक लगानी कोष हो । सात बर्षे बन्दमुखी लक्ष्मी इक्विटी फण्डको प्रति इकाई १० रुपैयाँ मूल्यको एक अर्ब बराबरको दश करोड ईकाई निष्कासन गर्ने अनुमति बोर्डले दिएको हो। कम्पनीले अबको तीन साता भित्र ईकाइ जारी गर्नेछ ।

नेपालमा हालसम्म दश वटा म्युुचुुअल फण्डहरु संचालनमा रहेका छन । सिद्धार्थ इन्भेष्टमेन्ट ग्रोथ स्कीम १, सिद्धार्थ इक्वीटी ओरिएन्टेड स्कीम, लक्ष्मी भ्यालु फण्ड,नवील ब्यालेन्स फण्ड १, एनआइबिएल समृद्धि फण्ड,एनएमबी सुलभ इन्भेष्टमेन्ट फण्ड,ग्लोबल आइएमई समुुन्नति स्कीम, एनएमबी हाइब्रिड फण्ड १ र नवील इक्वीटी फण्ड संचालनमा रहेका छन ।

शेयर बजारमा जोखिम मूल्याङकन गरी लगानी गर्न नसक्नेहरुका लागि यस्ता सामुहिक लगानी कोष निकै उपयोगी हुने गरेका छन् । यस्ता कम्पनीहरुले शेयर बजारमा कम्पनीको अबस्था, संस्थागत सुशासन, प्रगति गर्नसक्ने संभावना, जोखिमको अबस्थालगायतका बिषय मूल्याङकन गरी लगानी गर्ने हुँदा ईकाईधनी सर्बसाधारणले ढुक्कले प्रतिफल पाउने गर्छन ।

बर्षेनी ईकाईधनीले लाभांश पाउनुकासाथै अवधि समाप्त भएपछि जम्मा प्रतिफलसहितको एकमुष्ट रकम फिर्ता पाउने भएकाले सामुहिक लगानी कोष अति नै सुरक्षित मान्निछ । पछिल्लो समयमा सेयरबजारका लगानीकर्ताको आर्कषण यस्ता सामुहिक कोषहरुमा बढ्दै गएको देखिन्छ ।