ज्योति विकास बैंकका लगानीकर्तालाई ११.७ प्रतिशत बोनस शेयर र १ बराबर १ को अनुपातमा हकप्रद दिने

काठमाडौं – ज्योति विकास बैंक लिमिटेड (Jyoti Bikas Bank Limited) ले लगानीकर्तालाई ११ दशमलव ७० प्रतिशत बोनस शेयर दिने भएको छ । बैंक (JBBL) को विहिबार बसेको सञ्चालक समितिको २५४ औं बैठकले लगानीकर्तालाई उक्त लाभांश दिने प्रस्ताव गरेको हो ।

प्रस्तावित बोनस शेयर नेपाल राष्ट्र बैंकबाट स्विकृत भई बैंकको वार्षिक साधारण सभाबाट अनुमोदन भएपछि वितरण गरिने बैंकले जानकारी दिएको छ ।त्यस्तै सञ्चालक समितिको उक्त बैठकले बोनस शेयर वितरण पश्चात कायम चुक्तापूँजीमा १ बराबर १ को अनुपातमा हकप्रद शेयर दिने निर्णय गरेको छ ।

९२ करोड ३४ लाख रुपैयाँ चुक्ता पुँजी भएको ज्योति विकास बैंकले गतआर्थिक वर्षमा १५ करोड २१ लाख रुपैयाँ खुद मुनाफा कमाउन सफल भएको छ । बोनस वितरण पश्चात बैंकको चुक्तापुँजी १ अर्ब ३ करोड रुपैयाँ पुग्नेछ भने त्यसपछि कायम पूँजीको १०० प्रतिशत हकप्रद जारीपछि बैंकको चुक्ता पुँजी २ अर्ब नाघ्नेछ ।

बैंकले जगेडाकोषमा २३ करोड ४० लाख रुपैयाँ राखिएको छ । निक्षेपमा २१ दशलमव २४ प्रतिशत वृद्धि गरी ७ अर्ब ६७ करोड ७१ लाख रुपैयाँ संकलन गरेर कर्जामा ६ अर्ब ९५ लाख रुपैयाँ लगानी गरेको छ । बैंकको खुद व्याज आम्दानीमा १७ दशमलव ३७ प्रतिशतले वृद्धि गरी ३३ करोड १० लाख रुपैयाँ पुगेको छ । संचालन मुनाफामा १० दशमलव ८८ प्रतिशत वृद्धि गरी १६ करोड ३८ लाख रुपैयाँ पुगेको छ । बैंकको प्रोभिजनमा ५ करोड ४४ लाख रुपैयाँ राखिएको छ भने ४ करोड ७० लाख रुपैयाँ खराबकर्जा उठाउन सफल भएको छ ।

बैंकको प्रतिशेयर आम्दानी वार्षिक १६ दशमलव ४८ रुपैयाँ रहेको छ भने मुल्य आम्दानीको अनुपात १० दशमलव २६ गुणा रहेको छ । प्रतिशेयर नेटवर्थ १ सय २५ दशमलव ३५ रुपैयाँ र तरलता अनुपात ३५ दशमलव ९४ प्रतिशत रहेको छ । बैंकको निस्कृय कर्जा १ दशमलव ३९ प्रतिशत र जोखिम युत्त सम्पत्ति १६ दशमलव ७० प्रतिशत रहेको छ ।