नेप्से दोहोरो अंकले गिरावट

काठमाडौं – दशैं पछि कारोबार खुले पछि ओरालो लाग्न थालेको शेयर बजार परिसुचक सोमबार पनि ओरालो लागेको छ । सबै कम्पनीहरुको बोनसको आँकलन भैसकेको अवस्थामा नाफा सुरक्षित गर्ने क्रममा बेच्नेको संख्या धेरै भएका कारण बजार ओरालो लागेको हो । यस क्रममा सोमबार बजार परिसुचक नेप्से १० दशलव ३८ अंकले झरेर १७९३ दशमलव ३६ अंकमा आईपुगेको छ ।

अधिकांस कम्पनीहरुले दिने प्रतिफल प्रस्ताव गरिसकेको र अधिकांस लगानीकर्ता नाफामा रहँदा शेयर किन्नेको तुलनामा शेयर बेच्नेको संख्या धेरै भएको देखिन्छ । यस क्रममा सोमबार १ सय १६ कम्पनीका ७ लाख ८३ हजार ९ सय ९८ कित्ता शेयरहरु ३ हजार ६ सय ५३ कारोबारबाट ६३ करोड ६७ लाख ८६ हजार रुपैंयामा किनबेच भएका छन् ।

आइतबारको तुलनामा बजार घटे पनि कारोबार रकममा भने सामान्य वृद्धि भएको हो । आइतबार ६० करोडको मात्र शेयर किनबेच भएको थियो । जलविद्युत समुह १७ दशमलव ७६ र अन्य समुह शुन्य दशमलव ८७ अंकले बढेको बजारमा वाणिज्य बैंकमा १४ दशमलव ३९, होटलमा २२ दशमलव ७५, विकास बैंकमा ३ दशमलव ७४, वित्तमा २ दशमलव ६९ र बीमा समुहमा ६२ दशमलव ०१ अंकको गिरावट आएको छ ।

कुमारी बैंक, मंगलबारदेखि शेयरधनी पुस्तिका बन्द हुन लागेको प्रभु इन्स्योरेन्स, बैंक अफ काठमाण्डू लुम्बिनी लगायत कम्पनीहरुको अधिक मात्रामा शेयर कारोबार हुँदा विकास बैंक र जलविद्युत समुहका लगानीकर्ताले सबैभन्दा धेरै कमाएका छन् ।

धेरै गुमाउनेको सूचीमा पनि विकास बैंकका लगानीकर्ता नै रहेका छन् । बीमा तथा फाइनान्स र लघुवित्त समुहका लगानीकर्ताले पनि सोमबार बजारमा गुमाएका छन् ।

दशैं लगत्तै तिहार आउनै लाग्दा नाफा सुरक्षित गरी तत्काल शेयरमा लगानी नगरी केही समय हेरेर फेरी शेयर किन्ने सोचमा लगानीकर्ता पुग्दा पनि बजारमा सकरात्मक असर नदेखिएको हो । यद्यपी केही कम्पनीहरुमा परेको खरिद चाप, अनि शेयर मूल्यमा आएको वृद्धि लगायतका आधारलाई हेर्दा बजार सामान्य करेक्सनको अवस्थामा मात्र रहेको देखिन्छ ।