आजको मौसम : देशका अधिकांश भागमा पानी पर्ने सम्भावना

काठमाडौँ- नेपालमा मनसुन अझै केही दिने सक्रिय रहने मौसम पूर्वानुमान महाशाखाले जनाएको छ । नेपालबाट मनसुन बाहिरिने औसत मिति अक्टोबर २ रहे पनि यस वर्ष अझै सक्रिय रहेको छ ।

महाशाखाले भनेको छ, “नेपालमा मनसुनको बहिर्गमनको औसत मिति अक्टोबर २ रहेता पनि यस वर्षको मनसुन हालसम्म पनि सक्रिय अवस्थामा नै रहेको छ । हाल भारतको दक्षिण बिहार तथा आसपासतिर अवस्थित न्यून चापीय क्षेत्रको प्रभावका कारण देशभर आंशिक देखि सामान्य बदली छ।”

आइतबार बिहान प्रदेश १, प्रदेश २ र बागमती प्रदेशमा सामान्य र बाँकी भू-भागमा आंशिक बदली रहेको महाशाखाले जनाएको छ । प्रदेश १ र प्रदेश २ का अधिकांश स्थान र बाँकी प्रदेशका एक-दुई स्थानमा हल्कादेखि मध्यम वर्षा भइरहेको छ ।

दिउँसो पनि देशभर मौसम बदली रही देश १, प्रदेश २ र बागमती प्रदेशका अधिकांश स्थानमा र बाँकी प्रदेशका थोरै स्थानमा मेघगर्जनसहित हल्कादेखि मध्यम वर्षाको सम्भावना रहेको मौसम पूर्वानुमान महाशाखाले जनाएको छ । प्रदेश १ र प्रदेश २ का केही स्थानमा भने भीषण वर्षाको सम्भावना छ ।

महामशाखाले आइतबार राति देशभर आंशिकदेखि सामान्य बदली रही प्रदेश १ र प्रदेश २ का अधिकांश स्थानमा वर्षाको सम्भावना रहेको जनाएको छ । केही ठाउँमा भने भीषण वर्षा हुने जनाइएको छ । बाँकी प्रदेशका केही स्थानमा मेघगर्जनसहित हल्कादेखि मध्यम वर्षाको सम्भावना रहेको छ ।