आजदेखि टोखामा भेरोसेल खोप लगाइँदै(खोप केन्द्र सहित)

काठमाडौँ- यसअघि रोकिएको कोरोना खोप कार्यक्रम टोखा नगरपालिकामा पुनः सञ्चालन गरिएको छ ।

साउन १६ गते बिहान नगरपालिकाका परिवार नियोजन सुपरभाइजर निरीक्षक वसन्त गैरेमाथि हातपात भएपछि रोकिएको खोप कार्यक्रम आज (मंगलबार) देखि पुनः सञ्चालन गरिने भएको हो । खोप बिहान १० बजेदेखि लगाउन थालिने नगरपालिकाले जनाएको छ ।

स्वास्थ्यकर्मी कुटपिट गर्ने स्थानीयको समूहलाई प्रहरीले नियन्त्रणमा लिइसकेको र गल्ती गर्ने समूहले पिटाइ खाने स्वास्थ्यकर्मी तथा प्रहरीसँग माफी मागिसकेकाले खोप कार्यक्रमलाई आजदेखि पुनः निरन्तरता दिइएको नगर प्रमुख प्रकाश अधिकारीले बताएका छन् ।

नगरपालिकाले ५० वर्षमाथिका व्यक्ति, शिक्षक, प्राध्यापक, कर्मचारी, सार्वजनिक सवारी साधनका चालक एवं सहचालकलाई भेरोसेल खोप उपलब्ध गराउने जनाएको छ ।

नगरपालिकाभित्रका मापदण्ड पुगेका व्यक्तिलाई खोप उपलब्ध गराउनका लागि टोखा चण्डेश्वरी प्राथमिक स्वास्थ्य केन्द्र, ग्राण्डी अन्तर्राष्ट्रिय अस्पताल धापासी र मनोहर माध्यमिक विद्यालय सामाखुशीलाई खोप केन्द्र तोकिएको छ ।