विद्युत् खपत बढाउने नीति बनाउँदै छु : उर्जामन्त्री भुसाल

काठमाडौँ- ऊर्जा, जलस्रोत तथा सिँचाइमन्त्री पम्फा भुसालले ऊर्जाक्षेत्रको विकासमा हुने ढिलासुस्ती कम गर्न आफूले पहल गर्ने बताएकी छन् । उनले ससाना कामका लागि धेरै समय अल्झिनुपर्ने अवस्थामा सुधार ल्याउने समेत बताइन् ।

उनले स्वतन्त्र ऊर्जा उत्पादकको संस्था, नेपाल (इप्पान)सँग मंगलवार मन्त्रालयमा छलफल गर्दै समयको विलम्बलाई पनि अरू आर्थिक भ्रष्टाचारजस्तै मान्नुपर्ने बताइन् ।
आचारसंहिता बनाएर काम गर्ने शैलीको विकास गरिने उनले बताइन् । मन्त्री भुसालले भनिन्, “हामीले विधि वा आचारसंहिता केही बनाएर जानुपर्छ । कतिपय प्राविधिक कामलाई केही समय लाग्छ, त्यसको फरक तरीकाले टीओआर बनाउन सक्छौं।”

निजीक्षेत्रले एउटा आयोजना बनाउनका लागि धेरै मन्त्रालय र विभाग धाउनुपर्ने अवस्थाको अन्त्य गर्न छिट्टै अन्तरमन्त्रालय छलफल चलाउने मन्त्री भुसालले व्यवसायीलाई बताइन् ।

ऊर्जा र सिँचाइका कामलाई वस्तुगत र वैज्ञानिक बनाउने उनको भनाइ थियो । मन्त्री भुसालले भनिन्, “एउटै रूखका कारण वर्षौंसम्म काम रोएिको छ, त्यसलाई छिटोछरितो ढंगमा काम गर्नुपर्छ । यसलाई वस्तुगत र वैज्ञानिक बनाउनुपर्छ।”

निजीक्षेत्रका समस्या समाधानका लागि आफू सकारात्मक उनले बाताईन् । उनले भनिन्, “म यहाँहरूको समस्या समाधानप्रति अधिकतम सकारात्मक हुन्छु । त्यसमा म प्रतिबद्ध छु, पहल पनि गर्छु।” उत्पादन र वितरणको ठूलो समस्या रहेको औंल्याउँदै उनले प्राधिकरणले करोडौं क्षतिपूर्ति तिरिरहने र लगानीकर्ताले लगानीको ब्याजसम्म उठाउन नसक्ने समस्या आउन नहुने बताइन् ।

विद्युत् खपत बढाउनेतर्फ मन्त्रालयले गृहकार्य गरिरहेको समेत मन्त्री भुसालले बताइन् । विद्युतको पहुँच नपुगेका जनतामा विद्युत् पुर्‍याउन र खपत बढाउन विद्युत् महसुल घटाउने योजना ल्याउन लागेको उनले जानकारी दिइन् ।

भेटका अवसरमा ऊर्जा सचिव देवेन्द्र कार्कीले मन्त्रालयले सबै निजीक्षेत्रलाई समान तवरले व्यवहार गर्ने स्पष्ट गर्दै मन्त्रालयबाट भएका निर्णयहरूको कार्यान्वयन विशेष ध्यान दिने बताएका छन् ।

इप्पानका अध्यक्ष कृष्ण आचार्यले ऊर्जामा निजीक्षेत्रले काम गर्न सात मन्त्रालय र २३ विभागमा पुग्नुपर्ने बाध्यता रहेको भन्दै एकद्वार नीतिमार्फत सेवा लिने व्यवस्था मिलाउन अनुरोध गरे ।