बाढी पहिरोले आहिलेसम्म ५१ जनाको मृत्यु, २९ बेपत्ता

काठमाडौँ- देशका विभिन्न स्थानमा अविरल वर्षाका कारण आएको बाढी, पहिरो र डुबानमा परी ५१ जनाको मृत्यु भएको छ ।

मृत्यु हुने २६ पुरुष, १५ महिला, १० बालबालिका रहेका प्रहरी प्रधान कार्यालयले जनाएका छन् । तीमध्ये सिन्धुपाल्चोकमा पाँच, डोटीमा चार, रोल्पा, तनहुँ, दाङ, पाल्पा, दार्चुला र गोरखामा तीन(तीन, चितवन, प्युठान, धादिङ, म्याग्दी र रौतहटमा दुई-दुई र ललितपुर, मकवानपुर, सर्लाही, खोटाङ, सप्तरी, काभ्रे, सिन्धुली, जुम्ला, अर्घाखाँची, कास्की, कालिकोट, पाँचथर, बझाङ र बाजुरामा एक(एक जना रहेका छन् ।

बिहीबार मात्रै मात्रै सात जनाको मृत्यु भएको छ । दार्चुलामा तीन, पाल्पामा दुई तथा तनहुँ र दाङमा एक-एक जनाको मृत्यु भएको प्रहरी प्रधान कार्यालयबाट प्राप्त विवरणले जनाएको हो ।

बाढीपहिरो र डुबानमा परी मनसुन अवधिको जेठ ३० पछि आजसम्म ७१ जना घाइते भएका छन् । तीमध्ये ३६ पुरुष, १९ महिला, ११ जना बालक र पाँच जना बालिका छन् । यस्तै बाढी पहिरोमा परी २९ बेपत्ता छन् । तीमध्ये १९ पुरुष, ६ महिला, तीन बालक र एक बालिका रहेका छन् ।

बेपत्ता हुनेमा सिन्धुपाल्चोकका २०, चितवनका तीन, पर्वत र तनहुँका दुई-दुई तथा बाजुरा र बाग्लुङमा एक-एक जना छन् । प्रहरी प्रवक्ता बसन्तबहादुर कुँवरले बेपत्ताको खोजी कार्य जारी रहेको जानकारी दिए।

बाढीपहिरामा परेका एक हजार २६८ जनाको विभिन्न ठाउँबाट उद्दार गरिएको छ । बाढीको कारण एक हजार ५१६ घर डुबानमा परेका र ५६४ घर, ९९ गोठ, ४२ पुल, ३ विद्यालय र १३ सरकारी कार्यालयमा क्षति पुगेको छ । एक हजार १५८ घरका पाँच हजार ४२३ व्यक्ति विस्थापित भएका छन् ।