काठमाडौं उपत्यकाको निषेधाज्ञा आजदेखि खुकुलो

काठमाडौँ- काठमाडौं उपत्यकाको निषेधाज्ञा आजदेखि खुकुलो बनाइएको छ ।

एक हप्ताका लागि केही खुकुलो व्यवस्थासहित निषेधाज्ञा आजदेखि लागू भएको हो ।

आइतबार काठमाडौं, ललितपुर र भक्तपुरका प्रमुख जिल्ला अधिकारीहरुको संयुक्त बैठकले खुकुलो बनाउँदै निषेधाज्ञा थप्ने निर्णय गरेको थियो ।

उपत्यकाका निजी सवारी साधान आजदेखि जोरबिजोर प्रणालीअनुसार सञ्चालन गर्न पाइनेछ ।

यस्तै पसलहरु पनि बार अनुसार खोल्ने व्यवस्था गरिएको छ । आइतबार, मंगलबार र बिहीबार सुनचाँदी, भाँडा, विद्युतीय, घरायसी सामान, अटोमोबाइल र त्यसका पार्टपुर्जाका पसल खोल्न पाइने छ ।

यस्तै सोमबार, बुधबार र शुक्रबार सपिङ मल, खेलकुद सामग्री पसल, कपडा, जुत्ता पसल, फेन्सी, कस्मेटिक, गिफ्ट र टेलरिङ पसल खोल्न पाइने निर्णय गरिएको छ ।

बार अनुसार खुल्ने पसल बिहान ११ देखि अपराह्न ४ बजेसम्म खोल्न पाइने छ । खाद्यान्न, फलफूल र तरकारी पसल भने यसअघि नै दैनिक बिहान ११ बजेसम्म खुलिरहेका छन् ।