आजको मौसम : धेरै ठाउँको मौसम सामान्यतया सफा रहने

काठमाडौँ- आज काठमाण्डौ उपत्यकासहित देशका धेरैजसो ठाउँको मौसम सामान्यतया सफा रहेको छ ।

मौसमविद् सजिना शाक्यका अनुसार प्रदेश १ का केही ठाउँमा भने बादल लागेको र बाँकी ठाउँको मौसम सफा रहेको छ । मौसम पूर्वानुमान् महाशाखाले भारतको पश्चिम बंगाल आसपास बनेको न्यून चापीय क्षेत्रका कारण प्रदेश १ का केही ठाउँमा बादल लागेको र स्थानीय वायुका कारण अरु केही ठाउँमा सामान्य बादल लागे पनि अहिले देशमा पानी पार्ने उल्लेख्य प्रणाली नरहेको जनाएको छ ।

मौसमविद् शाक्यका अनुसार अझै केही दिन ठूलो पानी पार्ने खालको मौसमी प्रणाली आउने सम्भावना कम रहेको छ । प्रदेश १ का केही ठाउँमा भने सामान्य पानी पर्ने देखिएको छ । महाशाखाले प्रि–मनसुनको समय भएकोले दिउँसोपछि केही ठाउँमा बादल आएर सामान्य पानी पर्ने सम्भावना भने रहिरहने जनाएको छ ।