कोरोनाका विषयमा सरकारले तोकेका बाहेक व्यक्तिले सञ्चारमाध्यममा बोल्न नपाउने

काठमाडौं- कोभिड–१९ महामारीसहित समग्र जनस्वास्थ्यका विषयमा तोकिएका आधिकारिक व्यक्तिबाहेक अरुलाई जानकारी दिन रोक लगाउने स्वास्थ्य तथा जनसंख्या मन्त्रालयले निर्णय गरेको छ ।

मन्त्रालयमा हिजो बसेको बैठकले सरकारका विभागीय मन्त्रीहरु वा मन्त्रालयले तोकेका पदाधिकारीहरुबाहेकले आधिकारिक जानकारी वा पुष्ट्याइँ गर्न नपाउने निर्णय गरेको हो । मन्त्रालयले जनस्वास्थ्यका विषयमा असम्बन्धित व्यक्तिले सञ्चारमाध्यममा बोल्ने वा टिप्पणी गर्ने गरेकाले यसले नागरिकलाई भ्रमित बनाएको भन्दै यस्तो निर्णय गरिएको जनाएको छ ।

त्यस्तै, मन्त्रालयले सरकारले तोकेका बाहेक व्यक्तिबाहेकले दिएको जानकारी प्रकाशन तथा प्रसारण नगर्न पनि सञ्चारमाध्यमहरुलाई सूचित गरेको छ । सो निर्णय कार्यान्वयनका लागि मन्त्रिपरिषद्को कार्यालयमा पठाउन लागिएको मन्त्रालयले जनाएको छ ।