मानव जीवनका लागि कृषि अन्तिम विकल्प : कृषिमन्त्री केसी

कृषि तथा सहकारी मन्त्रालय तथा कृषि विकास निर्देशनालयअन्तरगत आव ०७६÷०७७ मा निर्माण सम्पन्न भएका योजनाहरुको प्रभावकारिता अनुगमन गर्न सोमबार वीरेन्द्रनगर नगरपालिकाको ३ र १० वडामा पुग्नुभएका मन्त्री केसीले मानव जीवनका लागि कृषि अपरिहार्य रहेको बताउनुभएको हो ।

उहाँले भन्नुभयो, “तपाईँ हामीले खेती गरेको आर्जनबाट घर बनाएकालाई सम्मान गरौँ । श्रमविना भ्रष्टाचार एवं अनियमितता गरेर महल ठड्याउनेलाई सबैले अस्वीकार गरौँ ।” उत्पादनशील जमीनमा तरकारी लगाएर आफूसहित कर्णालीलाई आत्मनिर्भर बनाउन कृषकहरुलाई उहाँले आग्रह गर्नुभयो । महिला र त्यसमा पनि दलित महिलाले अवसर पाए सजिलै काम गर्न सक्दा रहेछन् भन्ने राम्रो उदाहरण देखाएको भन्दै मन्त्री केसीले सुर्खेत बामेखोला ग्रामीण कृषि सडक उपभोक्ता समितिका अध्यक्ष लक्ष्मी विकको उहाँको कामको उच्च प्रशंसा गर्नुभयो ।

उपभोक्ता समितिका अध्यक्ष विकले सरकारले गरेको सहयोगले गरिब किसानहरुको पहुँच बजारसँग जोडिएको बताउनुभयो । “कृषि विकास निर्देशनालयले गत आवमा गरेको रु १७ लाख सहयोगले कल्भर्ट र ३०० मिटर सडक निर्माण भएको छ । अब त्यसमा ग्राभेलका लागि सरकारले थप सहयोग गरे उत्पादित तरकारी जतिबेला पनि बेच्न बजार लिन सकिन्छ,” उहाँले भन्नुभयो । कृषि विकास निर्देशनालयका निमित्त निर्देशक चित्रबहादुर रोकायले कल्भर्ट र सडक निर्माणले करिब २०० घर परिवार लाभान्वित भएको बताउनुभयो ।

ब्राईट मध्यपश्चिम कृषि तथा वन विज्ञान क्याम्पस सुर्खेतका प्रबन्ध निर्देशक पुष्कर खड्काले वीरेन्द्रनगर–३ तातोपानीस्थित पाँच बिघा जमीनमा रु २५ लाखमा निर्मित एकीकृत अर्गानिक कृषि मोडल फार्म प्रदर्शनी तथा अनफार्म अनुसन्धान प्लट स्थापनाले कर्णालीको कृषि तथा कृषि प्राविधिक जनशक्ति उत्पादनमा सहयोग पुग्ने बताउनुभयो ।