कोरोना संक्रमणको कारणले थप दुई जनाको मृत्यु

काठमाडौं –  नेपालमा कोरोना संक्रमणबाट थप दुई जनाको मृत्यु भएको छ । मृत्यु हुनेमा एक जना अर्घाखाचीका रहेका छन् भने एक जना कैलालीका रहेका छन् ।

कैलालीको गोदावरी नगरपालिका ४ का ४६ बर्षीय पुरुषको सेती प्रादेशिक अस्पतालमा उपचारका क्रममा मृत्यु भएको छ ।

उनि निमोनियाबाट पीडित थिए र स्वस्थ्यमा समस्या आएपछि धनगढीकै नवजिवन अस्पतालमा उपचार गर्न गएका उनलाई शनिबार कोरोना पुष्टि भएको थियो । त्यसपछि प्रादेशिक अस्पतालको आइसीयूमा उपचाररत उनको बुधबार मृत्यु भएको अस्पतालले जनाएको छ ।

आत्महत्या गरेका अर्घाखाँचीको शितगंगा नगरपालिका ५ का देबबहादुर विकको कोरोना रिपोर्ट पोजिटिभ आएको छ । भारतबाट आएर क्वारेन्टिनमा बसेका उनले मंगलबार राति रुखमा झुण्डिएर आत्महत्या गरेका थिए ।

विकको जेठ २४ गते आरडीटी पोजेटिभ आएपछि २५ गते पीसीआर परीक्षणका लागि स्वाबको नमुना संकलन गरेर प्रादेशिक प्रयोगशाला भैरहवा पठाइएको थियो ।

११ दिनपछि उनको रिपोर्ट पोजेटिभ आएको स्थानीय पालिकाले जनाएको छ ।