छुट्टाछुट्टै सवारी दुर्घटनामा पाँचजनाको मृत्यु

काठमान्डौ- आज छुट्टाछुट्टै भागमा भएका सवारी दुर्घटनामा परी पाँचजनाको मृत्यु भएको छ। भक्तपुरको सूर्यविनायक नगरपालिका-५ की २६ वर्षीया शान्ति गौतम र वीरगञ्ज महानगरपालिका-२१ का ३० वर्षीय अनिल यादव ट्रक दुर्घटनामा मृत्यु भएको केन्द्रीय प्रहरी समाचार कक्षले आज जनाएको छ ।

उक्त कक्षबाट प्राप्त समाचारअनुसार बिहीबार र शुक्रबारका सवारी दुर्घटनामा मकवानपुरको थाहानगरपालिका-६ का ६६ वर्षीय मुक्तिनाथ विडारीको मोटरसाइकल दुर्घटनामा, दोलखा-कालिञ्चोक गाउँपालिका-९ सुन्द्रावतीमा महासिवारात्रि मनाउने क्रममा बसले ठक्कर दिँदा १० वर्षीय पुजन थामी र पोखरा महानगरपालिका-११ फूलबारी सडकमा स्कुटर दुर्घटना हुँदा भोजपुरका ३० वर्षीय काइँला राईको मृत्यु भएको छ।