कोरोना सन्त्रास – जापानमा ६ हजार मास्क चोरी

टोकियो- कोरोना भाइरसको संक्रमणका कारण हाहाकार भएको सर्जिकल मास्क जापानको कोवेस्थित रेडक्रसको एक अस्पतालबाट चोरी भएको हो । चोरहरुले उक्त अस्पतालबाट करिव ६ हजार सर्जिकल मास्क चोरेर लगेका हुन् ।

चारवटा बाकसमा राखिएका उक्त मास्कहरु कोवेस्थित उक्त अस्पतालको भण्डारण कक्षबाट चोरी भएको उक्त अस्पतालका एक अधिकारीले बताएका छन् ।

उनले अगाडि भनेका छन्, ‘अस्पतालमा मास्कको संख्या धेरै भएकाले हाल उक्त चोरीले कुनै असर नगर्ने तर सो घटना अत्यन्त निन्दनीय छ।’

अस्पताल श्रोतका अनुसार ती मास्कहरु पक्कै पनि कुनै मेडिकल स्टोरमा सस्तो मुल्यमा बेचिएका हुनपर्छ । हाल कोरोना भाइरसका कारण चीनपछि दोश्रो बढी प्रभावित राष्ट्र जापान हो ।

यता जापान सरकारले मास्क निर्माताहरुलाई आफ्ना उत्पादनलाइ बढाउन अनुरोध गरेको छ । स्वास्थ्यप्रति सचेत राष्ट्रका मेडिकलहरुमा मास्कको हाहाकार हुनु दुखद हुने भन्दै सरकारले उनीहरुलाई आफ्नो उत्पादन बढाउन अनुरोध गरेको हो ।