कोरोना कहर – कोरिया जाने कामदारको भिषा थप्न आग्रह

काठमाडौं – दक्षिण कोरिया जाने श्रमिकको भिसाको म्याद सकिन लागेपछि ईपीएस कोरिया शाखाले भिसाको म्याद थप गरिदिन आग्रह गरेको छ। मार्चभित्रमा उडान नभए कोरिया जाने तयारीमा रहेका श्रमिकको भिसाको म्याद सकिने छ।

कोरियामा कोरोना भाइरसको संक्रमण फैलिँदै गएपछि त्यहाँ जाने तयारीमा रहेका श्रमिकको उडान पछि धकेलिएको छ। यसरी जाने तयारीमा करिव एक सय श्रमिक रहेको ईपीएस कोरिया शाखाले जनाएको छ ।

भिसा जारी भएको तीन महिनाभित्रमा त्यहाँ पुगिसक्नु पर्छ। तर मार्चभित्रैमा श्रमिक कोरिया जाने अवस्था आयो भने भिसा थपिरहनु नपर्ने पनि शाखाले जानकारी दिएको छ ।

भिसाको म्याद सकिएर समस्या नहोस् भनेर नेपालस्थित कोरिया दूतावासलाई पत्र पठाइसकिएको छ। दक्षिण कोरियाले पत्र पठाएर श्रमिक नपठाएको भन्दै नेपाल सरकारलाई असन्तुष्टि जनाई सकेको छ ।

कोरिया श्रमिक लैजान तयार भएपनि नेपालले रोकेको छ। कोरियामा अवस्था सहज भए मार्चभित्रै श्रमिक पठाउन कुनै समस्या नहुने ईपीएस शाखाले जनाएको छ।

दक्षिण कोरियाले सन् २००८ देखि नेपाली श्रमिक ईपीएसमार्फत लैजान थालेको हो। हालसम्म ६० हजार बढी श्रमिक ईपीएस मार्फत त्यहाँ पुगिसकेका छन्।