‘कोरियामा कार्यरत नेपाली कामदारलाई पेन्सन दिनुपर्यो’ -श्रम मन्त्री यादव

काठमाडौं- दक्षिण कोरियामा कार्यरत नेपाली श्रमिकहरुलाई पेन्सनको व्यवस्था गर्न श्रम, रोजगार तथा सामाजिक सुरक्षा मन्त्री रामेश्वर राय यादवले आग्रह गरेका छन्।

सोमबार दक्षिण कोरियाली राजदूत पार्क योङ्सिकसँग शिष्टाचार भेटको क्रममा कोरियामा कार्यरत नेपाली श्रमिकहरुलाई पेन्सन प्रणालीमा समेट्न आग्रह गरेका हुन्।

नेपाली युवाहरुका लागि कोरिया रोजगारीको आकर्षक गन्तव्य मुलुक भएकाले कोटा बढाउनुपर्नेमा समेत मन्त्री यादवले जोड दिए।

‘कोटा वृद्धि भए भाषा र सीप परीक्षण गरेर प्रतिक्षामा बस्नुपर्दैन‚’ मन्त्री यादवले भने।

साथै रोजगार अनुमति प्रणाली (ईपिएस) भाषा परीक्षालाई थप व्यवस्थित, मर्यादित बनाउनका लागि नेपाल प्रतिबद्ध रहेको मन्त्री यादवले बताएका छन्।

भेटका क्रममा कोरियाली राजदूत योङ्सिकले ईपिएस भाषा परीक्षालाई थप व्यवस्थित बनाउन कम्प्युटरमा आधारित परीक्षा (सीबिटी) सञ्चालन आवश्यक भएको बताए। सो व्यवस्थाका लागि पूर्वाधार निर्माणको तयारी गर्नुपर्नेमा उनले जोड दिए।

कोरियामा नेपाली कामदारहरुले आत्महत्या गर्ने प्रवृतिबारे चिन्ता व्यक्त गर्दै उनले यो प्रवृति अन्त्यका लागि श्रमिकहरुको पारिश्रमिक बढाउने तथा पारिवारिक भेटघाटलाई सहज बनाउन जोड दिने उल्लेख गरे।