सम्झाउँदा ठूला कुरा गरेपछि ठगलाई झापड हानेको हुँ – दीपक मनाङे

कास्की  – अखिल नेपाल फुटबल संघ एन्फा कास्कीका अध्यक्ष मिलन गुरुङलाई झापड हानेको विषयमा प्रष्ट पार्न गण्डकी प्रदेशका प्रदेश सभा सदस्य राजीव गुरुङ (दीपक मनाङे) मिडियामा आएका छन् ।

उनले आफूले ठगलाई झापड हानेको बताएका छन् ।

बुधबार आयोजित पत्रकार सम्मेलनमा उनले भने – ‘मनाङबाट आएका खेलाडीको बसोबास प्रबन्ध नमिलाएको देखेपछि सुरुमा सम्झाएको हुँ। तर, सम्झाउँदा ठूला कुरा गरेपछि ठगलाई झापड हानेँ’, पत्रकार सम्मेलनमा मनाङेले भने, ‘के ठगलाई झापड नहानेर माला लगाउने त ?’ उनले ठगलाई आफूले मात्र नभएर सबैले झापड हान्नुपर्ने बताए ।

मंगलबार पोखरामा आयोजित मुख्यमन्त्री कप फुटबलको उद्घाटन समारोहमा उनले मिलनलाई झापड हानेका थिए।

एन्फा अध्यक्ष गुरुङले बुधबार नै पत्रकार सम्मेलन गरेर सांसद मनाङेविरुद्ध प्रहरीमा उजुरी दिने बताए लगत्तै उनले पत्रकार सम्मेलन गरेका हुन् ।

उनले एन्फा अध्यक्ष गुरुङले भ्रष्टाचार गरेको आरोपसमेत लगाएका छन् ।