जापान जाने कामदारकाे परिक्षा केन्द्र ताेकियाे, नर्सिङ केयर गिभर परिक्षार्थी

काठमाडाैं-जापान रोजगारीका लागि पहिलो चरणमा नर्सिङ केयरगिभरमात्रै जान पाउने भएका छन्।१४ क्षेत्रका लागि कामदार लैजाने निर्णय गरेको जापानले पहिलो चरणमा नर्सिङ केयर गिभर लैजाने तयारी गरेको हो।

नर्सिङ केयरगिभरका लागि अक्टोबर २७, २८ र २९ गते जापानी भाषाको परीक्षा मिति तोकिएको श्रम, रोजगार तथा सामाजिक सुरक्षा मन्त्रालयले जनाएको छ।

अघिल्लो वर्ष जापानको मन्त्रिमण्डलले नेपाललगायत विभिन्न ९ मुलुकबाट १४ क्षेत्रमा काम गर्ने श्रमिक आपूर्ति गर्ने निर्णय गरेको थियो।सोही निर्णयअनुसार नेपाल जापानका रोजगारदाताका लागि श्रमिक आपूर्ति गर्ने सूचीमा परेको हो।

जापानले आगामी पाँच वर्षसम्म सूचीकृत नौ मुलुकबाट करिब साढे ३ लाख श्रमिक लैजाने घोषणा गरेको छ। नेपालबाट कति लैजाने भन्ने निर्णय नभएको बताइएको छ।

नर्सिङ केयरगिभरका रुपमा लैजाने कामदारको परीक्षा केन्द्र डिल्लीबजारस्थित युनिभर्सल ल्याङ्वेज एन्ड कम्प्युटर इन्स्टिच्युट तोकिएको हो। उक्त परीक्षाका लागि पहिलो चरणमा १ हजार आवेदन लिने जनाइएको छ।

नर्सिङ केयरगिभरको सिप परीक्षा ६० मिनेटको हुनेछ, जसमा ४५ वटा प्रश्न सोधिने छन्।

परीक्षा कम्प्युटर–बेस्ड टेस्टिङ विधिबाट लिइने छ। ४५ प्रश्नमध्ये ४० लिखित र बाँकी ५ प्रश्न व्यावहारिक प्रश्न हुने छन्। 

नर्सिङ केयर जापानिज ल्याङ्ग्वेज इभ्यालुयसन टेष्टमा भने १५ वटा प्रश्नहरु सोधिने छ। दुवै परीक्षाका लागि एक हजार जापनिज येन शुल्क लाग्ने छ।