लिबियामा भएको आक्रमणमा सन्तोष श्रेष्ठको मृत्यु ८ को उद्धार

काठमाडौं-लिबियाको राजधानी त्रिपोलीस्थित बन्दी गृहमा भएको आक्रमणमा एक नेपालीको ज्यान गएको छ भने ८ नेपालीको उद्धार गरेर नेपाल पठाइएको छ।

आप्रवासीसम्बन्धी अन्तर्राष्ट्रिय संस्था (आइओएम) ले इजिप्टस्थित नेपाली दूतावासलाई दिएको जानकारी अनुसार लिबियाको ताजौरा बन्दी केन्द्रमा भएको आक्रमणमा नेपाली नागरिक सन्तोष श्रेष्ठको ज्यान गएको हो |

आक्रमणमा परेका श्रेष्ठलाई उपचारका लागि अस्पताल पुर्याएपछि मृत घोषित गरिएको थियो। आक्रमणमा धेरै आप्रवासी र शरणार्थीको निधन भएको आइओएमले जनाएको छ।

लिवियामा रहेका अन्य ८ नेपालीलाई उद्धार गरी नेपाल फिर्ता पठाइएको छ।

उनीहरु बुधबार साँझ ५ बजेको टर्किस एअरलाइन्सको विमानबाट नेपाल फर्केका हुन्। अहिले पनि त्रिपोलीस्थित आइओएमको शिविरमा ६ नेपाली रहेको दूतावासले जानकारी दिएको छ।

पछिल्लो दुई महिनामा २६ नेपालीलाई लिबियाबाट उद्धार गरी नेपाल पठाइएको छ।

यीमध्ये धेरैजसोलाई लिबिया हुँदै इटाली पठाउन ल्याइएको पनि दूतावासले जानकारी दिएको छ। लिवियामा रहेका नेपाली शान्ति सेनाले यसबारे समन्वय गरिरहेको छ।