कोरियामा विदेशीको संख्या दोब्बर वृद्धि

सोल -रोजगारीको हिसाबले आकर्षक मानिएको दक्षिण कोरियामा विदेशीको संख्या दिन–प्रतिदिन बढ्दो छ । गएको एक दशकमा विदेशीको संख्या पहिले भएको संख्याको दोब्बर पुगेको यहाँको न्याय मन्त्रालयले प्रकाशित गरेको एक तथ्यांकले देखाएको छ ।

प्रकाशित तथ्यांक अनुसार सन् २०१६ सम्मको तथ्यांकमा पनि कोरियामा रहेका विदेशी मध्ये सबै भन्दा बढि चीनिया छन् । दोश्रोमा भियतनामीहरु रहेका छन् । सन् २००६ मा ९ लाख १० हजार रहेको बिदेशीको संख्या सन् २०१६ को अन्तिमसम्म आइपुग्दा बढेर २५ लाख भन्दा माथि पुगेको कोरियाली न्याय मन्त्रालयले बताएको छ ।

पछिल्लो समयमा बिदेशीको संख्या ह्वात्तै बढ्नुमा बिभिन्न क्षेत्रमा कोरियन कामदारको अभाब नै मुख्य कारण मानिएको छ ।

चिनियाहरुको संख्या कुल बिदेशीको संख्याको झन्डै आधा जति अर्थात ११ लाख भन्दा बढी छ भने भियातनामिको झन्डै डेढ लाखको हाराहारीमा छ । त्यस्तै तेस्रो स्थानमा रहेको अमेरिकनको संख्या १ लाख चालिस हजार भन्दा माथि रहेको बताइएको छ ।

कोरिया सरकारले बार्षिक रुपमा बिभिन्न देशबाट ५० हजार भन्दा बढि कामदार ल्याउने गरेको छ । हाल कोरियामा कार्यरत नेपालीको संख्या ४० हजार नाघिसकेको छ ।