जापानमा उच्च दक्ष विदेशीलाई पिआरमा सरलता, घरेलु कामदारलाई पनि ढोका खुल्यो

टोकियो – जापान सरकारले उच्च दक्ष विदेशीहरुलाई दिइदै आएको स्थायी बसोबास अनुमति (पिआर) प्रक्रियालाई अझ सहज बनाउने भएको छ ।आर्थिक क्षेत्रमा दक्ष र विशेषज्ञता हाँसिल गरेका विदेशीहरुलाई आकर्षित गर्ने उद्देश्यका साथ जापान सरकारले पिआर प्रक्रियालाई अझ सहज र सरल बनाउन लागेको हो ।

जापान न्याय मन्त्रालयले मंगलवार विश्वका प्रतिभाशाली र क्षमतावान जनशक्तिहरुलाई जापान भित्र्याउने योजना अनुरुप पिआर लगायतका कानूनी जटिलतामा सहज बनाउने बताएको हो ।

सोही अनुरुप सरकारले उच्चस्तरका दक्ष जनशक्तिहरुलाई पहिलो प्राथमिकतामा राखेको पनि बताएको छ । यस्ता जनशक्तिहरुलाई बढीमा तीन वर्ष वा एक वर्षमा नै पिआर दिने गरी कानूनी व्यवस्था गर्न लागेको छ ।

अहिलेको कानून अनुसार जापानमा पिआर पाउन विदेशी नागरिकले कम्तिमा पाँच वर्ष जापान बसेको हुनुपर्ने व्यवस्था छ । जापान न्याय मन्त्रालयले आगामी मार्चसम्ममा सो सम्बन्धी निर्देशिका तयार पर्ने बताएको छ ।

नयाँ व्यवस्थामा विदेहीरुरुले जापानमा गर्ने वार्षिक आम्दानी, शैक्षिक पृष्ठभूमि र भाषाको दक्षता लगायतका आधारमा मूल्यांकन गरिनेछ । साथै पिआर लिइसकेकाहरुले उनीहरुका अभिभावक र घरमा सघाउने कामदारलाई वर्किङ भिसामा ल्याउन पाइने प्रावधान समेत बनाइने छ ।

यसैबीच जापानको तल्लो सदनले केयरगिभर क्षेत्रमा काम गर्ने विदेशी कामदारलाई वर्किङ भिसा दिने गरी तयार भएको अध्यगमन संशोधन नीति पारित गरेको छ ।यो नीति पारित भएसँगै न्यून वेतन पाउने क्षेत्र जस्तै केयर गिभर, घरेलु कामदार र कृषि क्षेत्रमा कानूनी रुपमै वर्किङ भिसा लिएर जापान आउन पाउने बाटो खुलेको छ ।