जापानले विदेशी कामदारको संख्या दोब्बर पार्ने

काठमाडौँ – जापानमा विदेशी कामदारको संख्या दोब्बर पार्ने सरकारी योजना सार्वजनिक गरीएको छ । मुलुकको श्रम क्षेत्रमा घट्दो जनशक्तिको अभाव पूर्ति गर्न प्रधानमन्त्री सिञ्जो आबेको सरकारले विदेशी कामदारको संख्या दोब्बर पार्ने रणनीतिमा ल्याएको हो ।

प्रधानमन्त्री आबेका विशेष सल्लाहकार तथा उनको लिबरल डेमोक्रेटिक पार्टीका सांसद मासाशिको शिबायामाले गत हप्ता सिंगापुको एक सञ्चारमाध्यमलाई दिएको अन्तर्वार्तामा जापानी सरकारको नयाँ योजनाबारे खुलासा गरेका हुन् । उनका अनुसार विदेशी कामदारको संख्या दोब्बर पार्ने विषयमा जापान सरकार अहिले आन्तरिक तयारी गरीरहेको छ ।

शिबायामाले अन्तर्वार्तामा योजना अबका केही वर्षभित्रै लागू हुने जनाएका छन् । जापान सरकारको यो निश्चित लक्ष्य त होइन तर जापानको श्रम बजारमा घट्दै गएको जनशक्तिको अभाव पूरा गर्न विदेशी कामदारको संख्या दोब्बर बनाउँनुको विकल्प पनि रहने छैन -उनले भनेका छन् ।

त्यसैले धेरै भन्दा धेरै विदेशी कामदारहरुलाई कसरी दीर्घकालीन रुपमा भित्र्याउँन सकिन्छ भन्नेबारेमा जापान सरकार गम्भीर छलफलमा रहेको पनि उनले बताए । आवश्यक परे विद्यमान अद्यागमन नीतिमा समेत परिवर्तन हुनसक्नेतर्फ उनले औल्याए ।जापान टाइम्समा समाचार छ ।

जापानमा एकातिर जेष्ठ नागरिकहरुको संख्या बढ्दै गएको छ भने अर्कोतर्फ जन्मदर अत्यन्त न्यून बन्दै जाँदा सरकार चिन्तित बनेको हो । अहिले १२७ मिलियन जनसंख्या रहेको जापानको जनसंख्या जति न्यून भए पनि कम्तीमा १ सय मिलियन अर्थात १० करोडभन्दा कम हुन नदिन जापान सरकार गम्भीर भएर लागेको छ ।

जापान सरकारको अनुमानित तथ्यांक अनुसार हाल जापानमा १९ लाख विदेशी कामदारहरु वैधानिक रुपमा कार्यरत छन् । जापान सरकारले ल्याउँन लागेको नयाँ नीति अनुसार हाल तीन वर्षका लागि दिइदै आएको भीसाको अवधि थपेर पाँच वर्ष अवधिको बनाइनेछ ।

साथै नयाँ नीति आएपछि कुनै पनि जापानी कम्पनीहरुले विदेशी कामदारहरुलाई चाहे जतिको संख्यामा राख्न पाउँनेछन् ।भारत र भियातनामबाट प्राविधिक कामदारहरु ल्याउँने विषयमा पनि सरकार अहिले वहस र छलफलमा जुटेको छ ।