जापानले विदेशी कामदारलाई कृषि तथा घरेलु क्षेत्रमा वर्किङ भिसा दिने

टोकियो – जापान सरकारले दक्ष विदेशी कामदारलाई कृषि क्षेत्रमा काम गर्ने अनुमति दिने भएको छ । जापान सरकारको यो अनुमतिपछि जापानका निश्चित अञ्चलमा कृषि क्षेत्रमा काम गर्नका लागि विदेशी कामदारहरुले वर्किङ भिसा पाउँनेछन् । साथै जापान सरकारले घरेलु कामदारका लागि पनि विदेशीलाई वर्किङ भिसा दिनेबारेको निर्णय अर्को वर्षसम्ममा गरिसक्ने जनाएको छ ।

जापानको कृषि क्षेत्रमा देशिएको कामदारको अभावलाई पूर्ति गर्ने जापानको श्रम मन्त्रालयले विदेशी कामदारलाई अनुमति दिने निर्णय गरेको हो । यस्तो योजनमा जापान सरकार पहिले देखी नै छलफल गर्दै आएको थियो । त्यही योजना अनुसार मंगलवार सरकारले अद्यागमन कानूनमा संशोधन गर्ने औपचारिक निर्णय गरेको हो ।

साथै जापानको घट्दो जनसंख्यासँगै जेष्ठ नागरिकहरुको संख्या समेत बढ्दै गएपछि तिनीहरुको सहयोग र हेरविचारका लागि घरेलु कामदारमा विदशी कामदार झिकाउने प्रक्रिया अन्तिम चरणमा पुर्याएको छ ।

सल्लाहकार परिषदको मंगलवार भएको छलफलपछि प्रधानमन्त्री शिञ्जो अबेले कृषि क्षेत्रका लागि दक्ष विदेशी कामदारलाई वर्किङ भिसा उपलब्ध गराउने निर्णय गरेका हुन् ।जापानको कृषि मन्त्रालयका अनुसार जापानमा अहिले १.९२ मिलियन नागरिक कृषि क्षेत्रमा कार्यरत छन् । यो आवश्यक जनशक्ति भन्दा झण्डै ४० प्रतिशतले कम हो ।

घरेलु सहयोगी कामदारलाई भिसा दिनेबारे औपचारिक निर्णय छिट्टै गरि आगामी वर्षको अप्रिल महिनादेखि लागू गर्ने सरकारको योजना रहेको छ । यसरी आउँने कामदारहरुले इपीए लगायतका केही परीक्षा उत्तीर्ण गर्नुपर्ने जापान टुडेले जनाएको छ ।

यो भिसा उपलब्ध भएपछि इन्डोनेसिया, फिलिपिन्स, भियातनाम, भारत र नेपाल लगायतका कामदारहरु लाभान्वित हुनेछन् ।